УИХ-ын гишүүдийн ирц хүрэхгүй байсан ч хууль баталдаг “туршлага” манайд бий. 76 гишүүнээс 20-иодхон гишүүн чуулганы танхимд сууж байгаад эргэн тойрныхоо гишүүдийн кнопыг дараад л хууль баталчихдаг нь нууц биш. Үүнээс үүдэн хууль батлах процессийг кнопоор бус хурууны хээгээр баталдаг болгох хэрэгтэй гэж иргэд шүүмжилдэг. Энэ асуудал ч яригдаж эхэлсэн. Тэгвэл энэ асуудлыг шийдэх боломжтой эсэхийг УИХ-ын Тамгын газрын Ерөнхий нарийн бичгийн дарга Б.Болдбаатараас тодруулахад, “Энэ ажлыг бид судалж байгаа. Солонгосын нэгэн компанитай хамтрахаар ярилцаж, тус компани ирж судлаад явсан. Гэхдээ хурууны хээгээр ямар нэгэн зүйлийг нотлоход 90 хувийн магадлалтай байдаг гэсэн. Машин л юм болсон хойно гацна, саатна. Тэгэхэд миний машин гацчихлаа санал хураалтаа зогсоогоорой гэж хэлж болохгүй л дээ. Тиймээс давхар код байх хэрэг байх. Энэ мэтээр асуудлыг судалж байна” гэв.