Монгол Улсад өнөөдөр бүрэн эрхээ хэрэгжүүлэн ажиллаж буй ганц Ерөнхийлөгч бий. Харин бүрэн эрхийн хугацаа нь аль хэдийнэ дууссан мөртлөө барьцамтгай өөр нэг Ерөнхийлөгчтэй болчихоод удлаа. Мэдээж, янз бүрийн холбоод, төрийн бус байгууллагын ерөнхийлөгч нарыг энд оруулж тооцохгүй л дээ. Тэгэхээр анхны Ерөнхийлөгч П.Очирбатыг олон түмэн хүндэтгэдэг шиг тэрбээр өдгөө ШУТИС-д багшилсаар. Хоёр дахь Ерөнхийлөгч Н.Багабанди бүтээл туурвилаа хийсээр. Төрийн тэргүүний албанаасаа буугаад л тэд улс төрөөс хөндийрсөн гэхэд буруудахгүй биз. Хэн нь ч ард түмний өмнө жүжиг тоглож, анхных эсвэл хоёр дахь нь гэж шоудаагүй. Бүрэн эрхийнхээ хүрээнд үүргээ гүйцэтгээд төрийн хуулиа хүндэтгэж, улс төрийн тоглолт хийж байсангүй.

Гэвч тэдний дараа Ерөнхийлөгчөөр ажилласан Н.Энхбаяр л үе үе шоу, драм дэглэж, базаахгүй дүр төрх бүрдүүлэх болсон. Улс төрөөс хөндийрч энгийн иргэн шиг эгэл амьдралаараа олонд хүндлэгдэх бус хамаг будлиан, бужигнааныг удирдаж байна.  Хэдийгээр нэгэн цагт төрийн тэргүүн байсан гэж хүндэтгэж Ерөнхийлөгч асан гэх боловч ганц Н.Энхбаяр л “гурав дахь” гэсэн тодотголтой байсаар. Тэр тусам шүүхээс ял сонссон мөртлөө “Монгол Улсын гурав дахь Ерөнхийлөгч, Монгол ардын хувьсгалт намын дарга” гэж байнга хэлүүлж буй. Монгол Улсын бүх өндөр дээд албан тушаалыг хашиж үзсэн гэдгийг хэн хүнгүй мэдэж байгаа ч жирийн иргэн гэдгээ хүлээн зөвшөөрч чадахгүй байх шиг. Угтаа анхан шатны шүүхээс ял сонссон л бол хэнбугай ч гэсэн ялтанд тооцогддог хуулийн заалттай. Цагаан цаасан дээр хараар бичсэн Монгол Улсын хуулийг бүх хүн дагаж мөрдөн, биелүүлэх ёстой. Монгол Улсын Үндсэн хуульд хүн бүр шүүхийн өмнө эрх тэгш эрхтэй хэмээн заасан. Эрүүгийн байцаан шийтгэх хуулийн 14.1. “Монгол Улсад хүн бүр үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор ялгаварлан гадуурхагдахгүйгээр хууль, шүүхийн өмнө эрх тэгш байна” гэж заасан. Гэвч үүнийг зөрчиж байгаа Н.Энхбаярт иргэн хүний эрхээ эдэлж байгаа шигээ үүргээ биелүүлэх учиртай. 10 мянган төгрөг хулгайлаад 10 жилийн ял сонсч байсан тэр бүсгүйг хүн бүхэн жишээ болгон ярьдаг. Түүнийг ял сонссон даруйд л ялтанд тооцож байсан. Харин Монгол Улсын Ерөнхийлөгч байсан хүн аль дөрвөн сарын өмнө шүүхээс ял сонсч, ялтанд тооцогдож эхэлсэн ч өнөөг хүртэл элдэв сэтэр, чимэг зүүлтээ тайлсангүй. Тайлахыг ч хүссэнгүй. Дахиад ч улам нэмэгдэж магадгүй нь. Хорих газарт хоригдож байхдаа хүртэл “Би Ерөнхийлөгч чинь байна...” гэж хуулийн байгууллагын  албан тушаалтныг загнаж, зандарч байсан дүрс бичлэгийг үзээгүй хүн цөөн биз. Энэ бичлэгээс харахад өөрийгөө ингэж дуудуулахыг тэрбээр хамгийн ихээр хүсдэг бололтой.

Тэр ч бүү хэл, өөрийн хувь эзэмшдэг хэвлэл мэдээллийн хэрэгслүүдээр өдөр бүр “Монгол Улсын гурав дахь Ерөнхийлөгч, МАХН-ын дарга” гэж өөрийгөө тодотгож, сануулсаар. Сүүлдээ түүнийг Ерөнхийлөгч байхдаа ийм ажил хийж, гавьяа байгуулсан гэж сурталчилгаа маягтай нэвтрүүлэг цацаж, тайлан тавиад ч байх шиг.

Н.Энхбаярыг шүүж, авлигатай тууштай тэмцэж эхэлсэн гэдгээр нь олон улсад Монголыг үнэлж, дүгнэж байгаа. Түүний хийсэн хэргийн үнэн мөнийг гурав дахь засаглал болсон шүүх шүүн хэлэлцэж байхад элдэв жагсаал цуглаан зохион байгуулж, “Ард түмний Ерөнхийлөгчөө аваръя” гэдэг хөдөлгөөн хүртэл байгуулж, бусдаар өмөөрүүлэх гэж зүтгэнэ. Хууль, шүүхийн өмнө дарга ч бай, цэрэг ч байсан ч тэгш эрхтэй байх ёстой Монгол Улсын хуулийг үл хүндэтгэж, олон нийтийн санаа бодлыг төөрөгдүүлэх гэсэн явуургүй арга нь тийм ч хол явахгүй байх гэж найдъя. Тиймээс Н.Энхбаярыг Ерөнхийлөгч асан, МАХН-ын дарга ч гэхгүй ялтан гэх нь оновчтой болов уу. Хэрэг хийж шүүхээр ял сонссон жирийн нэгэн иргэнийг гэрийн эзэн тэр, эхнэр тэр гэдэггүйтэй л адил. Монгол Улсын иргэн Н.Энхбаярыг хуулиа биелүүлж шүүхийн өмнө тэгш эрхтэй байгаасай гэж хүснэм. Тэр бол одоо ял эдэлж буй ялтан. Урьд цагт хэн байсан нь чухал бус одоо хэн байгаагаар нь нэрлэх ёстой төрийн хуулиа дээдлэе.