Ерөнхийлөгчөөс өргөн барьсан УИХ-ын тухай хуульд нэмэлт өөрчлөлт оруулах тухай хуулийн хэлэлцэх эсэх асуудлыг УИХ-ын Төрийн байгуулалтын байнгын хорооны хуралдаанаар хэлэлцлээ. Энэ хуулийн хоёрдугаар зүйлийг УИХ-ын гишүүн Ц.Нямдорж, “Хоёрдугаар зүйлийг хэлэлцүүлгийн явцад анхаарах хэрэгтэй шүү. Энэ хуулийн төслөөр боло УИХ-ын гишүүний бүрэн эрхийн асуудал үнэхээр эмзэг асуудал болж таарах нь шүү” гэсэн шүүмжлэлийг өгсөн юм. Эл заалтын тухайд УИХ-ын гишүүн гэмт хэрэг хийсэн тохиолдолд түүнийг бүрэн эрхээс нь түдгэлзүүлэх асуудлыг Улсын Ерөнхий Прокурор мөрдөн байцаагчийн дүгнэлтийг үндэслэн танилцуулна гэж заасан аж. Уг нь, хуучин хуульд УИХ-ын гишүүн гэмт хэрэг хийж байгаад үйлдэл дээрээ баригдвал бүрэн эрхээсээ түдгэлздэг байсан байна. Нөгөөтэйгүүр УИХ-ын гишүүний бүрэн эрхийг УЕП өөрөө шалгасны үндсэн дээр УИХ-д өргөн мэдүүлдэг байж. МАН-ын гишүүдийн хувьд хуулийн хуучин заалтаар явах нь зүйтэй гэдгийг хэлж байсан юм. Гишүүн Ж.Энхбаярын хувьд “Энэ зүйл заалтыг тэр чигт нь хасвал яасан юм бэ. Олон улсын жишигт төрийн өндөр албан тушаалтан гэмт хэрэг хийвэл бүрэн эрхийн хугацаанд нь бус бүрэн эрхийн хугацаа дуусгавар болсны маргааш нь л гавлаад явчихдаг юм билээ. ийм жишгээр явбал зүгээр юм биш үү. Тэгэхгүй бол улс төрд тогтворгүй байдал үүснэ гэсэн байр суурийг илэрхийлж байлаа.
Мөн энэ асуудлыг Хууль зүйн сайд Х.Тэмүүжин, “ УИХ-ын гишүүнийг гэмт хэрэг хийсний улмаас түдгэлзүүлэх асуудлыг УИХ-д Ерөнхий прокурор танилцуулдаг байх нь зөв” гэсэн байр суурийг илэрхийлсэн юм. Ингээд энэ хуулийг УИХ-ын чуулганаар хэлэлцэх эсэхийг Төрийн байгуулалтын байнгын хорооны гишүүд дэмжэж, байнгын хорооны санал дүгнэлтийг УИХ-ын гишүүн Д.Эрдэнэбат танилцуулахаар болсон юм.