“МАХН-ын дарга, Ерөнхийлөгч асан Н.Энхбаярын бие эрс муудаж байгаа тухай мэдээллийг намын нөхөд нь өгч байна. Сүүлийн өдрүүдэд түүний бие улам дордож, өдөрт 300-500 грамм жин алдаж байгаа гэнэ. Хүн ингэж огцом жин алдах нь амь насанд нь халтай гэдгийг мэргэжилтнүүд хэлж байгаа аж.  
Тэрээр өдгөө ч Клиникийн хоёрдугаар эмнэлэгт хэвтэн эмчлүүлж байгаа билээ”
Ийм мэдээ ердөө долоо хоногийн өмнө арванхоёрдугаар сарын 13-нд  хэвлэлээр түгэж байсан. Хэдийгээр гэмт хэрэгтэн ч гэлээ хүн л юм болохоор “хөөрхий дөө, өдөрт 500-гаа байг гэхэд 300 грамм жин алдаад байвал яаж тэсэх вэ дээ” гэж бид өөр хоорондоо ярьж байлаа. Нээрээ ч тун хүнд, хэвтэрт орчихсон, тэгээд л турж эцээд байгаа юм болов уу гэж бодсоных тэр.

Гэтэл МАХН-аас орон нутгийн иргэдийн хуралд сонгогдсон хүмүүс нь хотод семинар ном хийснийхээ дараа өчигдөр түүнийг эргэж очиж байна аа. Мэдээж оруулахгүй юм болохоор дэмжигчид нь цонхон тушаа нь очиж “Биеэ бодоорой” хэмээн хашгиралдаж байна. Тэгтэл өнөөх хамаг жингээ алдаад өнөө маргаашаа хүлээж байгаа экс ерөнхийлөгч, хоригдол Энхбаяр маань цонхон дээр ирчихсэн хоёр гараараа даллаад, инээж ханиагаад, бас залбирч харагдах юм. Түшиж тулсан хүн дэргэд нь алга.

Намынхны нь хэлснээр бол 13-ны өдрөөс хойш л лав 3-4 кг турсан баймаар. Гэтэл түүнээс өмнө бас хэдий ч жингээ алдсан юм. Ингээд байсан хүн чинь юун инээхтэй мантай, босох ч тэнхэлгүй баймаар юм.
Юутай ч Монгол Улсын шүүхээс 2,6 жилийн ял авсан, хоригдол Н.Энхбаярын бие тэгтлээ муудаагүй, инээж ханиагаад, эмнэлэг дотор босоод явж байна. Тэр ингэж эмч нарыг, ард түмнийг Монгол төрийг, хууль шүүхийнхнийг хулхидан, ял завшиж байгаа юм биш биз.