УИХ-ын гишүүн Д.Арвин өнөөдөр Ардчилсан намд элслээ. Түүний намын батлахыг тус намын дарга Н.Алтанхуяг гардуулж, баяр хүргэсэн юм. Тэрээр намынхаа дотоод ардчилалгүй байдал, өөрчлөлт шинэчлэлтийг хийхээр удаа дараа ярьж байсан ч хэн ч тоогоогүй учраас ийм шийдвэр гаргасан гэх. Энэ үеэр тус намын дарга Н.Алтанхуяг “Ардчиллын үйл хэрэгт хүчин зүтгэж, хүн ардынхаа ахуй амьдралыг дээшлүүлье, монгол орноо шинэчилж өөрчлөе, улам хурдтай хамтарч хөгжүүлье хэмээн сонголт хийсэн Д.Арвин гишүүндээ баяр хүргэе” гэв. Харин Д.Арвин яагаад ийм сонголт хийх болсон тухайгаа “Би Ардчилсан намын өөрчлөлт шинэчлэлтийг дэмжиж, энэ намд элсэж байгаа. Монгол Улсад маш олон тулгамдсан асуудал байна. Хөдөлмөр эрхлэлтийг дэмжих, иргэдийг ажилтай болгох, хөрсний бохирдол зэрэг олон асуудалд сэтгэл зовнин ажил хийхээр өөрийнхөө нам болон бүлэгт санал гаргаж байсан ч тухайн үеийн намын удирдлагууд хүлээж авдаггүй байсан. Тиймээс цаашид энэ ажлыг хийхийн тулд Монголын төрд орж ирж байна. Миний үзэл бодол АН-тай нийлж байгаа учраас энэ намтай хамтарч ажиллахаар болсон. Нөгөө талаар намын бодлого шийдвэрийг биелүүлж ажиллана гэдгээ намын дарга таны өмнө хэлж байна” гэлээ.