Ерөнхийлөгчийн сонгуулийн санхүүжилт, хандивын талаар УИХ-ын чуулганы нэгдсэн хуралдаанаар хэлэлцлээ. Энэ хуулийн төслийг өчигдөр Төрийн байгуулалтын байнгын хорооны хурлаар хэлэлцэх үед УИХ-ын гишүүн Д.Лүндээжанцан хуулийн төсөлд заасан хандивын хэмжээ хэтэрхий их байна. тиймээс хандивын дээд хязгаарыг хуулийн этгээд 10, иргэн таван сая төгрөг байхаар тусгая гэж хэлж байсан юм. Харин УИХ-ын гишүүн Д.Эрдэнэбат, “2003 онд батлагдсан хуулиар л хандивын хэмжээг ингэж заасан байсан. Үүнийг өөчлөе гэж байгаа бол хуулийн этгээд 50, иргэн 10 сая хүртлэх төгрөгийн хандив өгдөх байхаар” тусгая гэж байсан юм. Хуулийн төсөлд хуулийн этгээд 100, иргэн 50 сая төгрөг байхаар тусгасан байсан юм. Харин энэ асуудлыг чуулганы хуралдаанаар хэлэлцэх үед цөөнх болсон Д.Лүндээжанцан, “Мөнгөний ханш тийм ч их өөрчлөгдөөгүй. Тиймээс би саналаа хэлж байна” гэв. Харин энэ асуудлаар санал хураахад Ерөнхийлөгчийн сонгуулийн хандив хуулийн этгээд 50, иргэн 10 сая төгрөг байхаар тогтлоо.