Монгол Улсын шүүхээс 2,6 жилийн хорих ял авсан, Монгол Улсын Ерөнхийлөгч асан, ялтан Намбарын Энхбаярыг өнөөдөр Шүүхийн шийдвэр гүйцэтгэлийн албаныхан Клиникийн хоёрдугаар эмнэлгээс гаргаж хорих анги руу авч явлаа. Дөнгөж сая авсан мэдээллээр түүнийг Зайсан руу авч явна гэж байгаагаас үзэхэд түүнийг хорихын эмнэлэг рүү авч явж байж болох юм.
Өнөөдөр УИХ-ын чуулганы нэгдсэн хуралдаантай ч МАХН-аас сонгогдож парламентад орсон гишүүд бүгд хуралдааны танхимд байхгүй байна гэсэн мэдээлэл бас байна. Тэгэхээр тэд намын даргыгаа шилжүүлэхтэй холбоотойгоор эзгүй байж магад.
Н.Энхбаярыг хоёрдугаар эмнэлэгт хэвтэж байгаа, өдөрт 300-500 грамм жин алдаж, гадаадад эмчлүүлэхгүй бол нас нь хэдэн хоногоор хэмжигдэж байна гэж намынхан болон дэмжигч эмч нар нь хэвлэлийн бага хурал хийлгэж байсан. Харин хоёр хоногийн өмнө намынх нь хөдөө орон нутгийн ажилтнууд түүнийг эмнэлэгт эргэж очиход тэрээр цонхны цаана ирж тэдэнтэйгээ мэндчилж байсан нь эрүүл мэнд нь тэгтлээ дордоогүй байгааг харуулсан юм.
Юутай ч хоригдол Намбарын Энхбаяр Клиникийн хоёрдугаар эмнэлгээс хорих анги руугаа шилжлээ.