Шинэ он гарснаас хойш товлосон УИХ-ын байнгын хорооны хурал, чуулганы хуралдаан цагтаа эхлэхгүй хойшлох, бүр цуцлах тохиолдол гарч байна. Энэ нь мэдээж, УИХ-ын гишүүдийн ирцтэй холбоотой. Өнөөдөр л гэхэд УИХ-ын Аюулгүй байдал, гадаад бодлогын байнгын хороо өглөө 09:00 цагт хуралдахаар товлосон байлаа. Гэвч гуравхан гишүүн ирж, бусдыгаа удтал хүлээсний эцэст хуралдаанаа цуцалсан юм. УИХ-ын Төрийн байгуулалтын байнгын хороо 10:00 цагт хуралдах байсан ч мөн л гишүүдийн ирц хүрэхгүй байсаар 11:00 цагийн үед эхэлсэн. Уг нь, чуулганы нэгдсэн хуралдааныг долоо хоног бүрийн пүрэв, баасан гарагийн өглөө 10:00 цагт эхлүүлдэг. Харин өнөөдөр 15:00 цагт товлосон байлаа. Учир нь, чуулганаар хэлэлцэх зарим асуудлыг холбогдох байнгын хороогоор хэлэлцүүлэх гэж ийн хойшлуулсан байв. Гишүүдийн ирц хүрэхгүй байсаар чуулганы хуралдаан ч цагтаа эхэлсэнгүй. Шинэ жилийн баяр тэмдэглээд гишүүд нэг л назгай байх шиг.
Уг нь, УИХ-ын гишүүдийн ирцийн мэдээнээс үзвэл, УИХ-ын 74 гишүүнээс 62 нь ажилдаа иржээ. Зургаа нь гадаадад, нэг нь орон нутагт яваа бол гурав нь өвчтэй, хоёр нь шалтгаангүй тасалсан байв. Тодруулбал, УИХ-ын гишүүн Л.Энх-Амгалан БНСУ, Х.Тэмүүжин Канад, М.Батчимэг АНУ, С.Баярцогт БНСУ, Д.Батцогт Хонконг, Д.Тэрбишдагва Сингапур руу явжээ. Харин УИХ-ын гишүүн М.Зоригт Сүхбаатар аймагт яваа юм байна. УИХ-ын гишүүн Сү.Батболд, Л.Болд, З.Баянсэлэнгэ нар өвчтэй байгаа бол Ч.Хүрэлбаатар, Д.Бат-Эрдэнэ нар ажлаа тасалжээ. Ч.Хүрэлбаатар БНХАУ-ыг зорьсон бол Д.Бат-Эрдэнэ Өмнөговь руу явсан аж.