Бид яахын тулд амьдардаг вэ? Энэ асуултад Монгол Улсын Ерөнхий сайд асан С.Баяр “Гадагшаа гарч биш улс орондоо сайхан амьдрахын тулд шүү дээ” хэмээн хариулсан байдаг. Харамсалтай нь С.Баяр дарга маань өнөөдрийг хүртэл амьдралынхаа зорилгод хүрч чадаагүй л яваад байгаа бололтой. Учир нь тэрээр АНУ, Канадаас хэсэн явсаар нэлээн олон жилийг үджээ. Сүүлд гарч байгаа мэдээллээр Канадаас орогнол  хүссэн ч гэх шиг. Тэгэхээр амьдралынхаа зорилгыг бүүр мартахаар шийдсэн бололтой. Уг нь амьдралынхаа зорилгыг биелүүлэх гэж Монголдоо хэсэг зуур саатсан нь үнэн. Намын дарга, Ерөнхий сайдын өндөр дээд сэнтийд хүртэл суусаан. Гэвч тэр үед өөрийн ярьж байсан  хөрөнгөний анхны хуримтлалаа л хийж байсан бололтой. Та санаж байгаа бол 2006 онд тэрээр МАХН-ын ерөнхий нарийн бичиг дарга байхдаа “Өнөөдөр бидний үед хөрөнгөний анхны хуримтлал л явагдаж байна.  Дээр үед бол романтик байжээ.  Одоо бол хувийн ашиг сонирхлоо мэдэрчихсэн прагматик болж. Аргагүй шүү дээ амьдрал ингэж өөрчлөгдөөд байхад... Хөрөнгөний хуримтлал хийгдэж дуусаагүй байна. Хувьчлагдах ёстой обьектууд хувьчлагдаж дуусаагүй байна” гэж ярьж байсан санагдана. Хэрвээ та энэ үгийг санахгүй байгаа бол хамт суугаад ярьж байсан хотын дарга Э.Бат-Үүлээс асуугаад үзээрэй. Тэгэхээр С.Баяр намын дарга болонгуутаа хувьчлах ёстой обьектуудаа хувьчилчихаад, хөрөнгөний хуримтлалаа хийж явсаар бидэнд амласан үндсэн зорилгоо мартжээ.
Харьд одсон С.Баярт сайд болонгуутаа удаах зорилгоо биелүүлээд үндсэн зорилгоо мартсан гэдгийг сануулаад өгөх хүн байгаа болов уу?

Гадаадад гарч амьдрах биш хэмээн ярьж байсан С.Баярын бичлэгийг хажууд нь оруулав. Бичлэгээс түүний юу гэж ярихыг үзэж болно.