Шинэ оны мэнд­чилгээ нэг нэ­гэн­дээ хүр­гэж дуусаагүй байхад Ца­­гаан сарын тухай яриад эхэл­чихлээ. Хэдхэн хоногийн өмнө эмэгтэй ги­шүүд баяраар хятадын бүтээгдэхүүн бэлэглэх уламжлалыг халах санаа­чил­га гаргасан. Ерөнхий сайд эмэгтэй гишүүдийн санаа­чил­гыг дэмжээд барахгүй үндэс­ний үйлдвэрлэгчдийн бүтээгдэхүүний зар суртал­чилгааны ажилд өөрийн биеэр оролцов. Гадаад харилцааны яаманд “Шинэчилж шийдье” уриан дор үндэсний үйлд­вэр­лэгчдийг цуглуулж, Ца­гаан сараар ямар бэлэг өгч бо­лох талаар санал бодлоо хуваалцсан нь энэ. ҮХААЯ-ны Төрийн нарийн бичгийн дарга Х.Золжаргал “Цагаан сарын бэлгэнд зориулан Хятадаас 10 тэрбум төгрөгийн бараа бүтээгдэхүүн худалдаж авдаг. Манай үйлдвэрлэгчдэд хийж чадахгүй зүйл байхгүй. Хамгийн гол нь, иргэд ямар төрлийн зүйл бэлгэнд өгөх талаар нь мэдэж загвар, уут, сав баглааг нь анхаарах хэрэгтэй байна” гэсэн юм. Ерөнхий сайд Н.Алтанхуяг “Нэг сарын дараа Монголын уламжлалт үндэсний баяр Цагаан сар болох гэж байна. Хорьсон, хориогүй ч манайхан энэхүү баяраар бие биендээ бэлэг өгөөд сурчихаж. Сүүлийн үед харин хэрэгтэй, хэрэггүй зүйлс өгснөөс гээд мөнгө өгдөг болсон байна. Үндэсний үйлдвэрлэлээ дэмжээрэй гэ­сээр байгаад хүмүүс бүр залх­чихаж. Дотоодын үйлдвэрийн бүтээгдэхүүнээ бэлэглээч гэ­хээр үнэ­тэй юмыг яаж авч, хүнд бэлэг­лэх юм гэх юм. 5-20 мянган төгрөгт багтаагаад өгчих гоё бэлэгнүүд байна шүү дээ” гэв.
Хэвлэлийн компаниуд гэхэд Монголын нууц товчоог санал болгож байна. “Ханбогд кашмер”-ын 8000 төгрөгийн бээлий, “Алтай кашмер” гэхэд 5-15 мянган төгрөгт ноосон болон ноолууран бээлий, “Блю скай” компанийн 4000 төгрөгийн оймс гээд бэлгэнд өгөх зүйлс зөндөө. 20 мянган төгрөгийн түрийвч, 8-10 мянган төгрөгийн савхин бээлий нэгэндээ бэлэглэе л дээ хэмээн Ерөнхий сайд нэр дурдан рекламдав. Ингээд Монгол орон даяар телевизээр уг уулзалтыг шууд дамжуулж байгааг далимдуулан Цагаан сараар өгч болох бэлгийг сурталчилах даал­гавар өгөв. “Ханбогд кашмер” ком­паниас ноолууран хөөрөг­ний уут хийснээ сонирхуулав. “Өлзий”, “Хас” хээгээр чимэг­лэ­сэн янз бүрийн хэмжээтэй хөөрөгний даалин 15-35 мянган төгрөг гэв. Реклам хийхдээ үйлдвэрлэгчид маань тун маа­руухан байсан тул Ерөн­хий сайд “Үгүй, та нар чинь чан­га дуугаар юм аа сайхан рекламдаач. Би туслая” гээд ханцуй шамлан орох нь тэр. “Улаанбаатар хивс” компани Цагаан сарын бэл­гэнд зориулан сандал дээр тавих төрөл бүрийн олбог хийснээ сонирхуулав. Гоёмсог ууттай янз бүрийн хээ, зураг бүхий олбогнууд 4500-9000 төгрөгөөр худалдаанд гарчээ. Манайд зарагдаж буй хэдхэн сарын настай хятад тэлээнүүд 5000-аас дээш төгрөгийн үнэтэй. Арьс ширэн үйлдвэрлэгчид маань арьсан тэлээнүүд хийдэг ч сав баглаагүй зардаг дутагдал бий.

Харин Цагаан сарын бэлэгний санаачилгын дагуу арьсан гоёмсог тэлээнүүдийг зориулалтын хайрцагт савлаж, 8-15 мянган төгрөгөөр худалдаалж байгаа гэв. Манайхан сүүлийн үед дотор эрхтэнд сайн хэмээн Энэтхэг, Тайландын гэх 5000-10000 төгрөгийн зэс бугуйвчаар гоёх болсон. Харин нэгэн иргэн “Эрдэнэт” үйлдвэрийн зэсээр хийсэн бугуйвч 2000 төгрөг, гар утасны зүүлт энэ тэрийг сонирхуулсан нь хүмүүст ихэд таалагдав. За тэгээд чинээлэг нэгэнд зориулсан бэлэгнүүд бас байна аа. Мөнгөн хөөрөг 220-280 мянган төгрөг бол дөрвөн бэрхийн мөнгөн шагай мөн л 200 орчим мянган төгрөг байх жишээтэй.  Хэвлэлийн компаниуд энэ үеэр “Бэлэг бэлгийн дээд ном юм шүү” гэдэг уриалгыг олонтаа хэлцгээв. Монголын нууц товчоо хэмжээ, хайрцагтай, хайрцаггүйгээс шалтгаалан 5000-250,000 төгрөг багтаж байлаа. Уртын дуугаар уянгалах эгшигт ном ч гэсэн олны сонирхлыг татав. Д.Нацаг­дор­жийн түүвэр зохиолуудыг “Мини” ном болгон хатуу хавтастайгаар гурван хэсэгт хуваан хэвлэжээ. Хэмжээгээрээ бичгийн цаасны тал хэмжээтэй болохоор халааслаад явах, бэлгэнд ч тохиромжтой юм. Үнийн хувьд зохиолоосоо шалтгаалан 8-20 мянган төгрөг. “Ертөнцийн гурав”-ыг шүдэнзний хайрцагнаас арай томхон хэмжээтэй хэвлэж бүр ч “мини” болгочихож. Эд материаллаас авахуулаад эрүүл мэндэд хэрэгтэй ч бүтээгдэхүүн сурталчлав. Адууны яснаас гаргаж авсан кальцийн бэлдмэлийг ахмад настай хүмүүст өгөхийг уриалав. Импортоор орж ирж буй ижил бүтээгдэхүүнээсээ 1-8 дахин хямдхан сарын хэрэглээ нь 20 мянган төгрөг гэнэ. Адууны ясны зөөлөн эдээс гаргаж авсан үе мөчний болон зүрхний бэлдмэл болон гоо сайхны бүтээгдэхүүнүүдийг бэлгэнд өгөхийг үйлдвэрлэгчид уриаллаа.