Цагаатгах ажлыг удирдан зохион байгуулах комисс өчигдөр хуралдаж өнгөрсөн онд хийсэн ажлаа тайлагнан, энэ онд хийх ажил, зорилтоо тодорхойллоо.
Тус комисс өнгөрсөн онд Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийг хэрэгжүүлэх, хэлмэгдэгсдийн нэр төрийг сэргээж, дурсгалыг нь мөнхжүүлэх, нийгмийн халамжийн туслалцаа үзүүлэх, шалгаагүй үлдсэн хэргүүдийг үргэлжлүүлэн шалгуулах, хэлмэгдэгсдийг цагаатгуулах гээд олон  ажил хийжээ.  
ТЕГ-ын цагаатгалын тасгийн ажилтнууд 2009 оноос хойш 5753 иргэний хэргийг шалгаж дуусгасан аж. Одоо 850 гаруй иргэнд холбогдох хэргийг үргэлжлүүлэн шалгаж, энэ онд дуусгахаар төлөвлөн ажиллаж байна. Өнгөрсөн онд Улсын Дээд шүүх, УЕПГ улс төрийн хилс хэрэгт хэлмэгдсэн 831 иргэнийг цагаатгаж, 62 хүнд цагаатгалын үнэмлэх олгожээ. Ингэснээр 1939 оноос хойш 31931 хүнийг хилс хэргээс цагаатгаад байна.
Мөн ТЕГ-ын Архив-бүртгэлийн хэлтэс хилс хэргээс цагаатгасан иргэдийн архивын лавлагаа, тодорхойлолт, цагаатгасан шийдвэрийн хуулбарын хамт 373, Үндэсний төв архив хэлмэгдэгсдэд холбогдох хүн амын тухайн он, жилүүдийн тооллогын бүртгэлээс ам бүлийн лавлагаа 664-ийг гаргаж, хүсэлт тавьсан нэхэмжлэгчдэд олгож үйлчилсэн аж. Өнгөрсөн онд хэлмэгдсэн иргэд, тэдний төрөл төрөгсдөд 68.5 сая төгрөгийн нөхөн олговор олгожээ.  Сүүлийн 15 жилийн хугацаанд улс төрийн хилс хэрэгт цагаатгагдсан 17554 иргэнд 16,3 тэрбум төгрөгийн нөхөх олговор олгосон байна.
Комиссын хуралдаанаар 2011 онд дуусгавар болсон хэлмэгдэгсдийг цагаатгуулах тухай нэхэмжлэгчдийн өргөдлийг хүлээн авах болон цагаатгасан иргэдэд нөхөх олговор олгох хуулийн  үйлчлэх хугацааг сунгах, хэлмэгдэгсэд тэдний гэр бүл, үр хүүхэд, төрөл төрөгсдийн зүгээс орон байр, тэтгэмж, тэтгэвэр  түүнчлэн  нөхөх олговрын хэмжээг нэмэгдүүлэх зэрэг асуудлаар хуулийн төсөл боловсруулж, УИХ-д өргөн барих нь зүйтэй гэж үзлээ. Түүнчлэн хэрэг материал нь олдохгүй, нотлох баримтгүй хэлмэгдсэн гэх иргэд, хуучин ЗХУ-д баривчлагдан хүргэгдэж шийтгүүлсэн, сураггүй болсон иргэдийнхээ асуудлыг бүрэн шийдвэрлэх шаардлагатай байгааг комисс анхаарч дээрх асуудлыг 2013 оны ажлын төлөвлгөөндөө тусгаж ажиллахаар болсон юм.