УИХ-ын Хууль зүйн байнгын хорооны 2013 оны анхны хуралдаан өнөөдөр болж Монгол Улс дахь Хүний эрх, эрх чөлөөний байдлын талаарх ХҮЭК-ын илтгэл,  Монгол Улсын шүүхийн тухай багц хуулийн төсөл, Ажлын хэсэг байгуулах тухай асуудлуудыг хэлэлцэв.
УИХ-ын Хүний эрхийн дэд хорооны гишүүд өчигдөр Шүүхийн шийдвэр гүйцэтгэх ерөнхий газрын харьяа зарим хорих байгууллагын үйл ажиллагаатай танилцсан юм. Энэ ажлын үр дүнг сонсч ярилцсан юм. Монгол дахь хүний эрх, эрх чөлөөний байдлын талаарх 11 дэх удаагийн энэхүү илтгэлд нийгэмд тулгамдаж буй, зайлшгүй анхаарвал зохих “Хорих байгууллага ба хүний эрх”, “Хөдөлмөрлөх эрхтэй холбоотой хүний эрх”, “Уул уурхай ба хүний эрх”, “Эрүүл мэндээ хамгаалуулах эрхийн зарим асуудал” гэсэн үндсэн дөрвөн асуудлыг тодотгожээ. Үүнийг УИХ-ын чуулганы хуралдаанаар шийдвэрлүүлэх зургаан асуудлаар зөвлөмж хүргүүлээд байгаа талаараа ХЭҮК-ын дарга Ж.Бямбадорж танилцуулав. Уг илтгэлийн анхны хэлэлцүүлэг буюу Хүний эрхийн дэд хороо өнгөрсөн оны 12 дугаар сарны 26-ны хуралдаанаараа хэлэлцсэн юм. Энэ үед ХҮЭК уул уурхайтай холбоотой хүний эрхийн зөрчлийн талаар энэ оны илтгэлд тусгайлан нарийвчлан тусгаж УИХ-аар хэлэлцүүлнэ гэсэн болохоор энэ удаагийн илтгэлд дурдсан “Уул уурхай ба хүний эрх сэдвээр тодорхой шийдвэр гаргахыг хойшлуулсан юм.
ХЭҮК-ын илтгэлтэй холбогдуулан гишүүд санал хэлсэн юм.
УИХ-ын дарга З.Энхболд “ХЭҮК-ын илтгэлд Үйлдвэрчний эвлэлийн эрхтэй холбоотой 4 заалт анх удаа оруулсан нь учир дутагдалтай юм. Төрийн болон хувийн хэвшлийн байгууллагын ажилтнуудын ажлыг шударгаар үнэлнэ” гэдэг нь ажил олгогч, ажилтан хоёрын хооронд байгуулж буй өнөөгийн гэрээнд үйлдвэрчний эвлэл хөндлөнгөөс оролцож, түүнийг  үгүйсгэж байгаа” гэв.
УИХ-ын гишүүн Ж.Батзандан “байгуулагдаад удаж байгаа ч хүний эрхийн төлөв байдалд дорвитой өөрчлөлт гараагүй, статистик судалгаа, зөвлөмж гаргаж илтгэл хэлэлцүүлэхээс хэтэрдэггүй” хэмээн тус байгууллагыг мөн л хатуухан үгээр шүүмжилсэн. Мөн одоогийн үйлдвэрчний эвлэл нь хэтэрхий монополь байдалтай байгаа нь буруу. Тиймээс чөлөөт зах зээлийн нийгэмд тохируулж одоогийн үйлдвэрчний эвлэлийг задлах хэрэгтэй гэв.