Нийслэлийн Багануур дүүрэгт орон нутгийн сонгуулиар бий болсон удирдлагын бүрэлдэхүүнийг сөрөг хүчин болон нийслэлийн Засаг дарга Э.Бат-Үүл хүлээн зөвшөөрөхгүйгээс үүдэж багагүй маргаан дэгдсэн. АН-ынхан Засаг дарга Ц.Сандаг-Очир руу гутал, сандал шидэж хэвлэлээр багагүй шуугиан тарьсан. Тэгвэл энэ маргааныг хэлэлцээрийн журмаар шийдэх ажлыг хэсэг гарч ажилласан юм. Нийслэлийн Засаг даргын орлогч Н.Батаагаар ахлуулсан ажлын хэсгийнхэн Багануур дүүрэгт ажиллаж асуудлыг шийдвэрлэжээ. МАН-ынхан олонхи болсон ч харилцан тохиролцсоны үндсэн дээр Засаг даргын тамгаа АН-д шилжүүлж Ц.Гончигжавыг томилж Засаг дарга Э.Бат-Үүлээр батламжлуулжээ. Харин ИТХ-ын даргаа олонхийн бүлэг авсан байна. Тэрчлэн Засаг даргын тамгын газраа олонх нь гэхчлэн газар, хэлтсийн дарга нараа хүртэл хувааж авсан байна.