“Монголын төмөр зам” ТӨХК-ийн захирал М.Энхсайханыг ажлаас нь чөлөөлжээ. Төрийн өмчийн хороо өнөөдөр ийм шийдвэр гаргасан байна. 1,5 тэрбум ам.долларын бондын 330 сая ам.доллараар хэд хэдэн газарт 30-40 км урттай төмөр зам барихаар төлөвлөсөн боловч МТЗ ТӨХК-ийн захирал М.Энхсайхан мөнгийг өөр үр ашигтай зүйлд зарцуулах ёстой гэж үзсэн нь үл ойлголцол үүсгэсэн гэж мэдээлж байгаа юм. Гэхдээ эх сурвалжийн мэдээлснээр огт өөр шалтгаанаар түүнийг ажлаас нь чөлөөлсөн аж.

Гурван жилийн өмнө буюу 2010 оны зургадугаар сарын 24-ний өдөр УИХ-ын нэгдсэн чуулганаар Төрөөс төмөр замын тээврийн талаар баримтлах бодлого батлагдаж, 32 дугаар тогтоол гарсан. Төмөр замын бодлогоор нийт 5600 гаруй км төмөр замыг гурван үе шаттайгаар барихаар болсон. Ингэхдээ шинэ төмөр замын царигийг өргөн байхаар тогтсон билээ. Төмөр замын бүтээн байгуулалт хийснээр Монголын уул уурхайн баялаг дэлхийн зах зээл дээр гарах боломж нээгдэнэ хэмээн үзсэн. 

Гэтэл өчигдөр Эдийн засгийн байнгын хорооны хуралдааны үеэр “Эрдэнэс Таван толгой” компанийн захирал Я.Батсуурийн мэдээлэл дунд “Монголын төмөр зам компанийн захирал М.Энхсайхан шинэ төмөр замыг нарийн царигаар барих санал тавьсан” гэж дурдагдаад өнгөрсөн. Харин Уул уурхайн сайд Д.Ганхуяг “УИХ-аас гарсан шийдвэрийг Засгийн газар хэрэгжүүлдэг. Засгийн газрын шийдвэрийг компани хэрэгжүүлдэг. Тиймээс УИХ-аас өргөн царигтай төмөр зам барина гээд баталчихсан болохоор энэ дагуу явна” гэсэн тайлбар хэлж байсан.

Шинэ төмөр замын бүтээн байгуулалтын ажлыг хариуцаж, гүйцэтгэх ёстой төрийн өмчийн компани бол МТЗ. Гэтэл төрийн өмчийн компанид томилогдож очоод удаагүй байгаа М.Энхсайхан захирал Засгийн, төрийн бодлогоосоо гадуур зүйл ярьж яваа нь зүйд нийцэхгүй л баймаар. Нарийн царигаар төмөр замаа баривал байгалийн баялаг маань Хятад гэсэн ганцхан улс руу гарах цаашлаад нэг улсаас хараат болох аюултай. Дэлхийд нөлөөтэй хөршөөсөө хараат болчихгүйн тулд Төрөөс төмөр замын талаар баримтлах бодлогынхоо дагуу олон улс оронд уул уурхайн түүхий эдээ гаргадаг байх нь чухал гэдгийг дотоодын төдийгүй гадаадын эдийн засагчид, албаныхан хэлж байгаа. Гэтэл УИХ-ын шийдвэрийг гүйцэтгэх ёстой Засгийн газрын шууд харьяаны төрийн өмчийн компанийн удирдлага Хятад улсад үйлчилж буй мэт нарийн цариг ярьж яваа нь цаашдаа төрийн ажлыг гацаах эрсдэлтэй. Түүнээс гадна гурван жилийн өмнө батлагдсан бодлогыг төрийн өмчийн компанийн захирал биелүүлэх үүрэгтэй болохоос зөрчиж, өөрийн дураад улс орныхоо эсрэг санал тавьж явах нь М.Энхсайханыг хятадуудад үйлчлээд байна уу хэмээн ойлгогдохоор байна.