“Эрдэнэс Таван Толгой” ХК Гашуун Сухайтын хилийн боомтын дэргэдэх Цагаан хаданд нүүрс буулгах ачих үйл ажиллагаа явуулдаг “Алтан говь” компанид үйлчилгээний төлбөрөө өгч чадахгүйд хүрснээс нүүрс тээвэрлэлт нь зогсчээ.  Өнгөрсөн баасан гарагаас нүүрс буулгах, ачих үйл ажиллагаа нь зогссон бөгөөд үүнээс үүдэн нүүрсний тээвэрлэлт эрхэлдэг олон аж ахуйн нэгжид сул зогсолт, ажилгүйдэл бий болж, эсэргүүцэл жагсаал зохион байгуулахдаа хүрсэн байна.
“Эрдэнэс Таван Толгой” ХК-ийн нүүрс тээвэрлэлт ийн зогссоноос болж хятадын талд ч сул зогсолт бий болж, асуудал үүсээд байгааг эх сурвалж хэлж байна. Шинэчлэлийн Засгийн газар “Эрдэнэс Таван Толгой” ХК-д санхүүгийн дэмжлэг  үзүүлж, төслийг урагшлуулахын тулд  Хөгжлийн банкнаас 200 сая ам.долларын зээл олгохоор 148 дугаар тогтоол гаргасан. Гэвч зээл олголт удааширснаас “Эрдэнэс Тавантолгой” ХК-д бэрхшээлтэй асуудлууд ар араасаа тулгарсаар байгаа аж.
Засгийн газраас төслийг нэн яаралтай дэмжиж, санхүүжилтээ өгөхгүй бол тус компанийн нүүрс олборлолт хэзээ мөдгүй зогсоход хүрчээ.