Шүүх засаглал хараат бусаар ажиллах ёстой. Иймээс зөвхөн хуулийн дагуу, баримтад тулгуурлан тухайн хүний гэм буруутай эсэхийг тогтоодог. Сүүлийн үед хараат бус засаглалд халдах гэсэн оролдлого чамгүй их гарах болж. Шүүхийн шийдвэрийг өөрчлүүлэхээр хууль тогтоох байгууллагын үйл ажиллагаанд гацаа үүсгэх, нийтийг хамарсан жагсаал хийх, хэн нэгний эрх ашгийн үүднээс өлсгөлөн зарлах гэх мэтээр эсэргүүцэн тэмцэж байна. Өвөрхангайн тойрогт үүссэн маргааныг шүүх буруу шийдвэрлэсэн гэж МАН-ынхан гоморхож, “Сүх” жанжны талбайд жагсаал хийснээр шүүхийн бие даасан байдалд халдах гэсэн нь оролдлого байсан . Төрд заларсан МАН-ын гишүүд үүнээс үүдэлтэйгээр парламентын нэг өдрийн ажлыг тасалдуулсан. Өөрөөр хэлбэл, шийдвэрээ эргэн харж, манай талд ашигтайгаар шийд хэмээн тулгасан юм. Энэ мэтээр шүүх рүү шууд халдах оролдлого хийсээр.
Өнөөдөр ч ийм зүйл үүсчихээд байна. МАХН-ын дарга, Ерөнхийлөгч асан Н.Энхбаярыг ямар ч үнэ цэнээр хамаагүй суллуулахаар тэмцээд эхэлчихлээ. Тэр хүнийг ямар нэгэн буруу үйлдэл хийгээгүй байхад нь ял зэм хүртээсэн юм байх. Зөв зүгээр сууж байхад нь л шүүх танхимд дуудан авчраад хилс хэрэг тулган Монгол Улсын нэрийн өмнөөс хэмээн цоллож ял өгчихсөн гэж яриад байгаа. Түүнийг юу ч хийсэн бай өршөөж, эвийлэн эрхлүүлэх ёстой гэсэн зарчмаар хандах. МАХН-МҮАН-ын “Шударга ёс” эвслээс нэр дэвшин төрийн түшээ болсон эрхмүүд даргаа аврах гэж тун их тэмцэх болсон. Бүр Н.Энхбаярыг суллах хуулийн төсөл ч санаачилсан удаатай. Тодруулбал, Үндэсний аюулгүй байдлын зөвлөлийн тухай хуульд нэмэлт өөрчлөлт оруулах замаар “наамбарваан”-ыгаа шоронгоос гарган авч болно хэмээн сэтгэсэн хэрэг. Гэвч уг хуулийн төслийг нь бүтцийн байгууллагын хуралдаанаар хэлэлцэх үед унагасан юм. Харин тэдний дараагийн алхам тэмцлийн хурц хэлбэр болж байна.
Өөрөөр хэлбэл, Н.Энхбаярыг бурханчлан тахин шүтэх эмэгтэйчүүд амь биеэ үл хайрлан өлсч эхэллээ. МАХН-ын даргыг суллахгүй, эрчимт эмчилгээнд хамруулж, амьд явах эрхийг нь хангахгүй бол өслгөлөнгөө зогсоохгүй нь. АН-ын даргад хандан дээрх үгийг өлсгөлөн зарлаж буй долоон эх илгээсэн байна. Хэрэв иймэрхүү маягаар шүүхийн шийдвэрийг өөрчлүүлээд байвал буруу зөвийг дэнслэн, шүүн таслах ажиллагаа явуулах шаардлага байна уу. Алдаатай үйлдлийнхээ төлөө гэм буруугаа хүлээх ёстой байтал бусдаар өмгөөлүүлэн, эрх чөлөөтэй болохоор зүтгэх нь шударга биш байлтай.
Н.Энхбаяраас бусад нь буруутай үйлдлийнхээ горыг амсан нийгмээс тусгаарлагдан яваа. Энэ хүн л хууль үйлдэлдээ хариуцлага тооцуулах ёсгүй мэтээр ярьж байгаа нь зүйд нийцэхгүй. Хүн бүр хуулийн өмнө тэгш эрхтэй гэсэн заалт бий. Тэгвэл уг заалтад өөрчлөлт оруулан Н.Энхбаяраас бусад нь хуулийн өмнө тэгш эрхтэй гэх нь оновчтой мэт. Цаашид түүний энэхүү дархан эрхийг нь үр хүүхэд нь залгамжилна гэвэл бүр ч оновчтой болох биз.