Боловсрол, соёл, шинжлэх ухааны сайд асан Ё.Отгонбаяр албан тушаалаа ашиглан мөнгө завшсан байж болзошгүй хэргийг цагдаагийнхан шалгаж, эрүүгийн хэрэг үүсгэхээр болсон байна. Ингээд мөрдөн шалгах явцад түүнтэй холбоотой байж болох Багшийн хөгжлийн ордонг улсын төсвийн 6,2 тэрбум төгрөгийн хөрөнгөөр бариулах үедээ хууль зөрчсөнөөс гадна 2,7 тэрбум төгрөгийн хохирол улсад учруулсан байж болзошгүйг цагдаагийнхан илрүүлсэн гэх. Түүнээс гадна эхнэрийнх нь нэр дээр байсан 26 данс өдгөө 36 болсныг эх сурвалжууд хэлэх боллоо.
"Багшийн хөгжлийн ордон"-г 2009 онд Японы буцалтгүй тусламжийн 6,3 тэрбум төгрөгийн хөрөнгөөр барих тендер зарласан ч Ё.Отгонбаяр албан тушаалаа ашиглан БНСУ-ын "Sangbo constraction" гэх компанид тендергүйгээр олгосон нь илэрчээ. Ингээд 6,2 тэрбум төгрөгийг дансаар шилжүүлсэн ч өнөөх компани нь ордны барилга барих эрхээ өөр компанид шилжүүлж 6,2 тэрбумаас 3,5 тэрбумыг нь шилжүүлжээ. Ингэж л дундаас 2,7 тэрбум төгрөг алга болжээ.
Энэ хэргийн улмаас УМБГ-аас Улсын ерөнхий прокурорт Ё.Отгонбаярыг авлига, албан тушаалын хэрэгт шалгах хүсэлтийг хүргүүлсэн байна. Хууль хяналтынхан хэргийг шалгаж 30 гаруй данс нуусан, бусдаас авилга өгөхийг шаардсан, дарамталсан зэрэг нь бараг нотлогдоод байгаа болохоор тэрээр УИХ-ын гишүүний бүрэн эрхээс татгалзаж, шалгуулахаас өөр аргагүй болоод байгаа юм. Үнэхээр л шалгуулахаас айхгүй байна гэж байгаа бол эрхэм гишүүн эр зориг гаргах л үлдлээ.