Улсын баяр наадам дөхөж сайд дарга нарын хөл хөнгөрч, сэтгэл нь гэгэлзэн хөдөө гадааг зорих болов. Ялангуяа уяач гишүүд маань олимпод орох гэж байгаа тамирчин шиг л нойр муутай байгаа сурагтай. Хурдан морь гэхээр төрийн ажлаа ч хойш тавьж чадах УИХ-ын гишүүн Г.Батхүү гишүүн маань Улсын баяр наадмын тухай хууль санаачлаад байгаа билээ. Олон жил хүний хүүхдээр морио унуулсан эрхэм гишүүн маань гэнэт зүүднээсээ сэрэх мэт унаач хүүхдийн тухай ам дуугарч байна. Угаасаа л нийгэмд унаач хүүхдийн аюулгүй байдлын тухай яриа газар аваад байгаа болохоор мань хүн ийн хууль санаачилж байна гэх хүн ч байна. Түүнийхээр унаач хүүхдүүд заавал даатгалд хамрагдсан, өвлийн цагт морь уралдуулахгүй байх, сум, аймгийн уяачдад цол олгодог байх зэрэг оржээ. Хамгийн гол нь монгол түмний уламжлал болсон Улсын наадамтай зэрэгцэн Үндэсний гэх баяр наадмыг гурван жилд нэг удаа хийхээр хуульчлан оруулсан нь ихэд анхаарал татсан асуудал байгаа юм. Тэрээр Монголд байсхийгээд л хэд хоногоор амардаг хавтгайрсан баяр наадам ер багадаагүй дээр нь баячуудын зэрлэг цэнгэл гэдэг өвлийн уралдаагыг болиулж уяач хүүхдүүдийн эрүүл мэндийг хамгаалах тухай энэ хуулиа УИХ-ын даргад өргөн бариад байгаа юм.

Бизнест одтой байсан шигээ улс төрд ч дээгүүр яваа эрхэм түшээ морь, нохой гэсэн хоёр хоббитой гэнэ. Энэ нь гадаадын баячууд нохой, монголын бачууд мориор өрсөлддөгтэй холбоотой болов уу. Түүний морьдын талаар монголчууд сайн мэдэх бөгөөд харин тавын таван нохой тэжээдэг гэдгийг тэр бүр мэддэггүй болов уу. Г.Батхүүгийн таван нохойны чимэг нь мөн л харийн тэрбумтнуудын хөтөлж явдаг добермен аж. Үнэхээр ч мань эр морь, нохойгоороо гайхуулж явахыг бодоход Монгол, гадаад тэрбумтны зангарагтай нэгэн гэдгээ харуулж буй гэх аж. Магадгүй өөрийнхөө хоббитой уялдаатай хууль санаачилдаг эрхэм гишүүн удахгүй сайн үүлдрийн нохойны тухай хууль санаачилж ч магадгүй нь.

Гэнэт ухаан орсон эрхэм гишүүн маань монгол хүний эрүүл мэндийн төлөө архины эсэг хууль санаачилж гурван сард нэг удаа архи зардаг өдөртэй болгож "уугч нөхөд"-үүдийн элгийг хамгаалаасай даа.