АНУ-ын Ерөнхийлөгч Барак Обама Монгол Улсын Ерөнхийлөгч Ц.Элбэгдоржийг дахин сонгогдсонд баяр хүргэсэн цахилгаан илгээжээ. Энэхүү баярын цахилгааны тухай Цагаан ордон мэдэгдэхдээ Б.Обама “Ерөнхийлөгч Элбэгдорж бол эх орондоо ардчилал, эрх чөлөөг хөгжүүлж яваа удирдагч, АНУ-ын Ази төдийгүй дэлхий дахин дахь гол түнш” хэмээн үнэлсний зэрэгцээ Монголын ардчиллын тухайд “Монгол Улс ардчиллын ололт амжилт, эдийн засгийн либералчлалд гаргасан ахиц дэвшлээрээ дэлхий нийтэд эерэг өөрчлөлт шинэчлэлийн тод жишээ болж байгаа орон” хэмээн мэдэгдсэн гэдгийг дурджээ.
Өнгөрсөн пүрэв гаригт гаргасан мэдэгдэлдээ Б.Обама “Цаашид хоёр орныхоо найрамдалт харилцаа, хамтын ажиллагааг улам батжуулж бэхжүүлэхийн төлөө Ерөнхийлөгч Ц.Элбэгдоржтой хамтран ажиллах болно” гэдгээ баталсан байна.