“Гудамж” төслийн хүрээнд Дарь-Эх Сансарын уулзварыг дөрвөн замын уулзвар болгон шинэчилж, өчигдөрхөн нээсэн бол өнөөдөр 19 дүгээр хорооллын буюу АПУ ХК-ийн арын уулзварыг мөн адил бүх чигийн хөдөлгөөнтэй болгож, ашиглалтад орууллаа. Энэ ажлын зураг төслийг “Ростов” ХХК хийж, гүйцэтгэгчээр “Пауэр ложистикс” ХХК ажилласан юм.

Энэ уулзвар өмнө нь хоёр чигийн урсгалтай, хоёр талынхаа туслах зам руу зөвхөн баруун гар тийш эргэх хөдөлгөөний зохицуулалттай, түгжрэл их үүсдэг замын нэг байсан. Харин бүх чигийн хөдөлгөөний зохицуулалттай, нэмэлт гэрэл дохиотой болгож өргөтгөн шинэчилснээр нэвтрүүлэх чадвар сайтай, түгжрэл саадгүй дөрвөн замын уулзвар болж байна. Тус уулзварын гэрэл дохиог нэмж, шинэчлэх ажлыг “Эйкшн нэт” ХХК гүйцэтгэлээ.

19 дүгээр хорооллын АПУ ХК-ийн арын уулзварын шинэчлэл нь “Гудамж” төслийн хүрээнд хийх 33 уулзварын шинэчлэлийн ажлаас бүрэн хэрэгжиж ашиглалтад орж буй дөрөв дэх уулзвар юм.

Ийнхүү нийслэл хотын авто замын сүлжээ өдрөөс өдөрт өргөжиж, буруу зохион байгуулалттай, түгжрэл их үүсдэг замуудын ачаалал буурах бодит боломж бүрдэж байна. “Гудамж” төслийн хүрээнд нийслэлийн 33 уулзварыг өргөтгөн шинэчлэх “Хотын төв” дэд төслийн ажил үргэлжилж байна.