Өнөөдөр нийслэл хот аялал жуулчлалын сурталчилгааны төвтэй боллоо. Нээлтэнд хотын дарга тэргүүтэй албаны хүмүүс оролцож энэ оны аялал жуулчлалын маршрут, зохион байгуулагдах үйл ажиллагаа зэргийг танилцууллаа.
Энэхүү төв нь гадаадын төдийгүй дотоодын жуулчдыг хүлээн авах, аялал жуулчлалын байгууллагуудтай холбож өгөх үйлчилгээ үзүүлэхээс гадна мэдээлэл хүссэн жуулчдад хаана, хаана ямар үзвэр үйлчилгээний хуваарьтай байгаа талаар мэдээлэл өгөх юм байна. Мөн монгол орны 21 аймагт аялал жуулчлалын маршрутаар аялуулахаас гадна Улаанбаатар хотоор тусгай автобус гарган гадаадын жуулчдад нийслэл хотыг танилцуулах ажээ. Тус төв зөвхөн жуулчдад үйлчлээд зогсохгүй нийслэлийн аялал жуулчлалын байгууллагын ажилтнуудыг сургаж мэргэшүүлэх үүднээс иж бүрэн сургалтын баазтай хичээлийн танхимтай юм байна.