Төрийн өндөр албан тушаалд гармагцаа л ах дүү, амраг саднаа аль гайгүй гэсэн местэнд шургуулдаг уламжлал болсон гэмээр байдал Монголд ноёрхоод удлаа. Аль нэг нам сонгуульд ялалт байгуулмагцаа л эсрэг намын үед ажиллаж байсан хүмүүсийг "цэвэрлэж" өөрсдийн чих зөөлөнтэй хүмүүсээр сольдог энэ ажил бүр хэрээс хэтрэх шинжтэй. Түүнээс гадна нам доторхи фракц бүлэглэлүүд өөрсдийн хүнээ ийш тийш нь шургуулах ажил сонгуулийн дараанаас жинхэнэ идэвхжиж эхэлдэг. Гэхдээ хамгийн хүчтэй нь төрлийн хүндээ албан тушаал атгуулах нь их.

Тухайлбал төрийн албыг төрлийн алба болгож байгаа ажил Ерөнхий сайдаас эхтэй. Эрхэм сайдын дүү Н.Наранцэцэгийн охин Г.Уянга нь "Таван толгой" компанийн 17 тэрбумын тендэрт өрсөлдөгчгүй ялсан хэмээн хэсэг хэвлэлийн "од" болсон. Тэгээд ч зогссонгүй Г.Уяангын нөхөр Г.Дэнзэн буюу эрхэм Ерөнхий сайдын маань хүргэн хүү хүчээ үзүүлэхээр Засгийн газрын хэрэг эрхлэх газрын дэд дарга гэсэн сэнтийд заларсан. Мань эр хадам ахын буянаар бүр газар авсан. Юу гэвэл "Таван толгой" компанийн ТУЗ-ийн дарга, Төрийн банкны ТУЗ-ын гишүүн гээд олон газарт данстай.
Бас болоогүй ээ, Ерөнхий сайдын хамаатан Б.Ганцэцэг гэгч Хөдөлмөрийн яамны төрийн нарийн бичгийн даргаар ажилладаг. Гэхдээ Ерөнхий сайдын маань хамаатнууд харамсалтай нь "Шинэчлэлийн засгийн газар"-ыг шавартай хутгаж мэдэхээр нөхдүүд болох нь ар араасаа дагуулсан олон дуулианууд нь гэрчилнэ.

Төрлийн албаны дараагийн нэг эрхэм бол Монголын төрд насаараа шахуу зүтгэж энэ удаад сонгуулиар ялалт байгуулаад байгаа АН-ын лидр гишүүдийн нэг С.Баярцогт юм. Хөрөнгө орлогынхоо мэдүүлгийг худлаа гаргадаг байсан нь илэрсэн энэ эрхэм УИХ-ын дэд даргын суудлаасаа мултарснаар хэрэг намжив бололтой. Түүний төрсөн ах С.Баярбат нь Эрчим хүчний яамны газрын дарга болсон нэгэн. Мөн МУИС-ийн ТУЗ-ийн дарга болж төрлийн албын улааг үргэлжлүүлэн эхнэр Ч.Нарантуяа нь МУИС-ийн дэд захирлаар дэвшсэн байдаг.

"Сентоза"-гийн эзэн, царайлаг гишүүн гэж шар хэвлэлээр яригддаг УИХ-ын гишүүн С.Одонтуяа бол ардчиллын лидрүүдийн нэг С.Эрдэнийн гарын хүн. Эрхэм хатагтай ч Баянгол дүүрэгт С.Эрдэнэ гишүүний ар талыг хариуцан хэдэн жил зүтгэж олонд танигдсаны хүчинд энэ сонгуулиар УИХ-ын гишүүн болсон. Түүний нөхөр ч мөн төрлийн албанд хамрагдана хэмээн учир мэдэх хүмүүс жиг жуг хийх юм билээ. Нөхөр Г.Өлзийбүрэн нь Газрын тосны хэрэг эрхлэх газрын дарга болсон юм.

УИХ-ын гишүүн А.Бакей эхнэрээ Үйлдвэр хөдөө аж ахуйн яамны газрын албаны даргаар, дүү А.Манкейгаа Баян-Өлгий аймгийн Засаг даргын тамгын газарт Тамгын газрын дарга хэмээх суудалд залруулсан. Түүнчлэн эхнэрийнхээ дүү З.Сарынбекийг Замын-Үүдийн гаалийн газрын орлогчид зүтгүүлсэн нь амжилт олсон юм.

УИХ-ын гишүүн Ш.Түвдэндорж ах Ш.Төмөрбаатарыгаа Нийслэлийн өмчийн газрын даргад дэвшүүлсэн гэдэг. Сонгууль болохоор л хамаг арын ажлыг нь зохицуулж явдаг ахдаа энэ зэргийн бэлэг барих цаг нь болсон байлгүй гэх хүн ч байна.

Экс Ерөнхийлөгч Н.Энхбаяртай хэвлэлээр дайн зарлаж өдөр шөнөгүй түүнг гоочилдог байсан Г.Уянга сэтгүүлч өнгөрсөн сонгуулиар УИХ-ын гишүүн болсон. Шинэхэн гишүүн ч хүчийг үзүүлсэн үү юутай ч 25-р суваг телевизийн мэдээний албанд байсан нөхөр Х.Баатархуяг нь МОНЦАМЭ агентлагийн дарга болсон.

ЭМШУИС-ийн ерөнхий захирал М.Сүмбэрзул Эдийн засгийн хөгжлийн сайд Н.Батбаярын дүү. М.Сүмбэрзул, Н.Батбаяр хоёрын эцэг эх нь хожуу гэрлэснээр тэд ах дүүгийн холбоотой болсон гэдэг юм билээ. Мөн Замын-Үүдийн Гаалийн газрын даргаар Н.Батбаяр сайдтаны дүү Н.Батсайхан гэж эрхэм бий.