Хөгжлийн бэрхшээлтэй, тэтгэврийн насны иргэд, эрхэлсэн ажилгүй залуус гээд нийгмийн эмзэг давхрагын 1050 иргэн хэрэгцээнийхээ хүнсний ногоог тариалах, хажуугаар нь худалдан борлуулж, амьдралдаа нэмэр болгох хувийн газартай боллоо.  Тэдэнд ногоо тарих зориулалт бүхий газрыг нийслэлийн захиргаанаас өгч байгаа юм. Дээрх иргэдийг  тус бүр 20 хүнтэй 53 бүлэгт хувааж, нийт 53 га газрыг эзэмшил болгон хуваарилан өглөө. Ингэснээр иргэд хүссэн хүнсний ногоогоо тариалж, амьдрал ахуйдаа ашиглах боломжтой болж байна. Өнөөдөр 53 бүлгийн ахлагч газрынхаа эрхийн бичгийг албан ёсоор гардаж авлаа. Тэд газартаа зөвхөн өөрсдийн хэрэгцээний ногоог тариад зогсохгүй, хэрэгцээнээс илүү гарснаа худалдан борлуулж, орлого олох ч боломж нээлттэй юм.
Нийслэлийн засаг даргын тамгын газар, Хөдөлмөрийн газраас хоёр дахь жилдээ “Нийслэлийн ажилгүй иргэдийг бүлгийн зохион байгуулалттай газар тариалан эрхлүүлэх хөтөлбөр” зохион байгуулж байгаа нь энэ юм.