Олон сая гэр бүлд үр хүүхэдтэй болох хүсэл мөрөөдлийг нь биелүүлж, аз жаргал бэлэглэж буй орчин үеийн анагаах ухааны дэвшил болох үр шилжүүлэн суулгах ажилбарыг өндөр үнэ төлбөрөөс нь болоод өнөөдөр хүссэн бүхэн хийлгэх боломжгүй байгаа. Тэгвэл өндөр үнэтэй энэ эмчилгээг ойрын ирээдүйд 200 евро орчмоор хийх боломжтой болно гэсэн сайхан мэдээг Бельгийн мэргэжилтнүүд дуулгалаа. Одоо үр шилжүүлэн суулгах ажилбарт ашиглаж буй тоног төхөөрөмж нь өндөр үнэ өртөгтэй учраас энэ ажилбар өөрөө үнэтэй болдог байна. Харин Бельгийн мэргэжилтнүүд тэр нарийн тоног төхөөрөмжийг бараг “гал тогоонд” ашиглахуйц энгийн багаж хэрэгсэл болгон хялбаршуулсан байна.
 Тэдний нэвтрүүлсэн хямд төсөр арга хэлбэрээр үр шилжүүлэн суулгах ажилбар хийлгэвэл одоогийнх шиг ойролцоогоор 6000 ам.доллараар хийлгэж буй үнийг нь хэд дахин буулгах боломжтой. Гэхдээ барууны өндөр хөгжилтэй орнуудад зардал нь 10-15 хувиар л буурах боломжтой, харин хөгжиж буй бусад оронд энэ хямд төсөр арга хэлбэрийг илүүтэй ашиглах ёстой гэж мэргэжилтнүүд нь үзэж байна.