УИХ-ын гишүүн асан У.Хүрэлсүх нийслэл хотод ирсэн сурагтай хэмээн сайтуудаар мэдээ гарах болов. Өвчтэй эхнэрээ хараад эмнэлгээс холдож чадахгүй байгаа хөөрхий тэр Монгол наадмаа үзэх гээд ирсэн байж болох ч хамгийн гол нь өнөө маргаашгүй МАН-ын Бага хурлын хуралдаан болох гэж байгаатай холбоотой байж мэдэх юм.

Удаа дараагийн шат шатны сонгуульд намаа ялагдуулсан өнөөгийн МАН-ын удирдлагыг халж солих нь зүйтэй гэж намаа шинэчлэхийг хүссэн залуучуудын “Шинэчилье” хөдөлгөөнийхөн яриад, шаардлага тавиад үүнийг нь намын Бага хурлаар ямар нэгэн хэмжээнд ярих гэж байгаа нь түүнийг эргэн ирэхэд хүргэсэн юм биш байгаа.
УИХ-ын хуралдааны танхимын үүдэнд төрийн түшээ Г.Баярсайханыг барьж авч зодон бяр чадлаа гайхуулсныхаа дараахан, өвчтэй эхнэрээ харъя хэмээн шалтаглан УИХ-ын гишүүний бүрэн эрхээсээ татгалзсан тэрээр эхлээд БНСУ-д эхнэрээ сахиж харж байгаа гэж байсан ч хожим нь Австралид байшин сууц аваад тухлан амьдарч байна гэж хэвлэлүүд шуугьсан.

Юутай УИХ-ын гишүүн, Засгийн газрын гишүүн-сайд, МАН-ын ерөнхий нарийн бичгийн дарга хэмээн зөөлөн суудлаас бууж үзээгүй ч “Намын нэр сольсноос болоод нам сонгуульд ялагдвал хариуцлагыг би хар толгойгоороо хүлээнэ” гэсэндээ хүрч УИХ-ын гишүүнээс татгалзаж байсан хүн. МАН сонгууль бүрээр луйвар хийж, ээлж халаагүйгээр төрийн эрх барьж байсан тэр үед нөмөр нөөлөгт нь байдаг хүмүүсээс У.Хүрэлсүхийг ирээдүйн Ерөнхий сайд гэж байсан удаа ч бий. Гэвч тэр энэ өндөрлөгт хүрээгүй. Одоо залуучуудыг дөрөөлөөд намын дарга болчихвол “Юмыг яаж мэдэх вэ, Ерөнхий сайдын суудал” гээд өвчтэй эхнэрээ орхиод ирсэн байхыг үгүйсгэхгүй.