Тархины хорт хавдрын хагалгааны дараах эмчилгээ хийлгэж буй Б.Танан охинд хандив өргөн, тус дэм болохоор Олимпийн анхны хос медалтан, аварга Н.Түвшинбаяр, Ази тивийн аварга, Гавьяат тамирчин Х.Цагаанбаатар нар өмсгөл, кимоногоо дуудлага худалдаагаар зарах гэж байна. Тавхан настай Б.Танан охин айлийн ганц хүүхэд бөгөөд өнгөрсөн оны 12 сарын 20-нд Солонгос улсад хагалгаа хийлгэсэн нь амжилттай болсон ч хагалгааны дараах хими, эс шилжүүлэн суулгах эмчилгээнүүдийг хийлгэж байж бүрэн эдгэрэх гэнэ. Одоогоор Солонгосын “Samsung Medical Center” эмнэлэгт эмчлүүлж байгаа тэрээр зургаан курс үргэлжлэх хими эмчилгээний дөрвийг нь хийлгэчихээд байгаа юм байна. Курс тус бүр нь нэг сар үргэлжилдэг тус эмчилгээний үнэ нь 60 сая төгрөг ба үүний дараагаар эс шилжүүлэн суулгах эмчилгээ хийгдэх юм байна. Гурван сард нэг удаа хийгддэг энэ эмчилгээ нь 70 сая вон буюу 140 сая төгрөгийн өртөгтэй аж.  Нийт 195 сая төгрөгийн эмчилгээний төлбөр хэрэгтэй байгаа учир аваргууд маань ийнхүү кимоногоо дуудлага худалдаагаар зарж хандив өргөх гэнэ. Анхны үнэ нь нэг сая төгрөгөөс эхэлсэн дуудлага худалдааны дээд үнэ одоогоор 2.5 саяд төгрөг хүрээд байна. Дуудлага худалдаа долоон өдрийн турш аваргуудын Facebook болон twitter хаягаар нээлттэй явагдана.