Энэ онд зургаан аймгийн төвийг Улаанбаатар хоттой хатуу хучилттай авто замаар холбохоор болсон. Уг ажлын хүрээнд Улаанбаатар-Баянхонгор чиглэлийн замын ажил дууссан бол бусад аймгийг нийслэлтэй холбох ажил төлөвлөгөөний дагуу явагдаж буй аж.
Ерөнхий сайд Н.Алтанхуяг зүүн чиглэлийн буюу Улаанбаатар-Чойбалсангийн чиглэлийн замын ажлын явцтай танилцаж, үүрэг даалгавар өглөө. Өндөрхаанаас Чойбалсан хүртэл 288 км замд зургаан компани гүйцэтгэчээр ажиллаж буй бөгөөд ажлын явц 33 хувьтай явж байгаа гэнэ. Хур бороо ихтэй байгаа нь зам барилгын ажилд хүндрэл учруулж байгаа ч гүйцэтгэгч компаниуд гурван ээлжээр ажиллах хүчээ зохион байгуулан өдөр шөнөгүй ажиллаж буй гэсэн.
Зургаан аймгийн төвийг хатуу хучилттай авто замаар холбох ажилд гүйцэтгэгчээр ажиллаж байгаа компаниудтай ажлаа чанаргүй гүйцэтгэсэн буюу хугацаанд нь дуусгаагүй тохиолдолд ирэх жил дахин ажил олгохгүй нөхцөлтэйгээр гэрээ байгуулан ажиллаж байгаа юм. Өндөрхаан-Чойбалсангийн чиглэлийн автозамд “Насны зам”, “Хансуун зам”, “Гашууны гол” зэрэг компани ажиллаж байгаа бөгөөд замын ажлыг олон компанид хувааж өгсөн нь гүйцэтгэлд сайнаар нөлөөлж байгааг зөвлөх компанийн удирдлагууд хэлж байлаа.  Хөгжлийн банкаар дамжуулан хийж байгаа замын ажлын санхүүжилтэд ямар нэгэн саад байхгүй. Мөнгө санхүүгийн бэрхшээлгүй учраас авсан замуудаа хугацаанд нь чанартай хийж дуусгаад ирэх арваннэгдүгээр сарын 15-нд ашиглалтад бүрэн хүлээлгэж өгөхийг гүйцэтгэгч болон зөвлөх компаниудын удирдлагуудад Ерөнхий сайд Н.Алтанхуяг үүрэг болголоо.