Нийслэлд дулааны шугам сүлжээний засварын ажил ид өрнөж байна. Гэтэл зарим аж ахуйн нэгж байгууллагууд дулааны шугам дайруулан байшин барилга барьж засварын ажил хийх ямар ч боломжгүй болгож орхижээ. Уг нь Нийслэлийн Засаг даргын захирамжаар дулааны шугамаас 5-7 метр байх ёстой гэж заасан байдаг аж. Жишээ нь, Хан-Уул дүүргийн нэгдүгээр хороонд “Глобал Тесунг” компани автомашины давхар гарааж барихдаа 80 см өргөнтэй шугам хоолойд тулгажээ. Түүнчлэн дөрөвдүгээр хороололд “Жэй энд Би трэйд” ХХК засварын газраа газар доогуурх шугам дээр байгуулсан аж. Баянзүрх дүүрэгт “Ийст” төвийн өмнө “Жаргалан” цайны газар, Сүхбаатар дүүрэгт “Континентал” зочид буудал мөн л шугам дээгүүр барилгаа дайруулан барьжээ. Энэ мэтээр дулааны шугам дээр буюу засвар үйлчилгээний боломжгүй болгосон нөхцөл нийслэлийн хэмжээнд 33 буй аж. Үүнээс гадна шугам хоолойн дэргэд барилга босгосон, эдэлбэр газраар нь шугам сүлжээ дайран өнгөрсөн зөрчилтэйгөө нийлбэл 300 гарчээ. Эдгээрээс Баянголд 80, Сонгинохайрханд 62, Баянзүрхт 51, Сүхбаатар дүүрэгт 48 зөрчил илэрч толгой цохиж яваа юм.