Өнөөдрөөс эхлээд нийслэл хотын гудамж замын хөдөлгөөнд оролцож байгаа авто машины жолооч нарыг хөдөлгөөний  дүрэм зөрчиж, зөрчил гаргахад томоохон осол л биш бол Замын цагдаагийн зохицуулагч очоод торгодгоо болино. Өөрөөр хэлбэл зохицуулагч, жолооч хоёр торгуулийн мөнгийг тохиролцож, жолооч ч багаханыг өгөх гэж, цагдаа ч торгуулийн хуудас бичилгүй халааслах гэхээ болино гэсэн үг.
Харин гудамж замд байрлуулсан хяналтын камерын бичлэгээр зөрчил гаргасан жолоочийн гэрийн хаягаар торгуулийн хуудсыг хүргүүлж байх юм байна. Торгуулийн хуудас нь нааж битүүмжилсэн, дотроо тухайн машины зөрчил гаргаж байгаа үеийн нь зургийг хавсаргасан, торгуулийн мөнгө тушаах дансны дугаар бичсэн байх юм байна.
Шинжлэх ухаан техникийн дэвшлийг ашиглаж замын хөдөлгөөний зохицуулагч нарын ажлыг хөнгөвчилсөн, бас тэдний хууль бус орлогыг хаасан энэ шийдвэр өнөөдрөөс хэрэгжиж эхэллээ.
Болгомжтой байж, Замын хөдөлгөөний дүрмээ чанд мөрдөцгөө жолооч нараа, хөдөлгөөн бүрийг тань харж байгаа шүү, цаадуул чинь.
Жаахан л гэнэ алдах юм уу, хэнэггүй царайлбал юмыг яаж мэдэх вэ, маргааш мөнгөний нэхэмжлэл гэрт чинь хүрээд очих нь байна шүү.