Замын хөдөлгөөний дүрэм зөрчсөн жолооч нарт өнөөдрөөс эхлэн торгуулийн хуудсыг гэрийн хаягаар нь хүргэнэ. Зөрчил гаргасан жолооч торгуулийн хуудас хүлээн авсанаас хойш 14 хоногийн дотор төлбөрийг заасан дансанд хийх үүрэгтэй бөгөөд төлөөгүй тохиолдолд жолоодох эрхийг нь зургаан сараас хоёр жил хүртэлх хугацаагаар хасна гэдгийг Замын хөдөлгөөний удирдлагын төвөөс мэдээллээ. Одоогийн байдлаар Энхтайваны өргөн чөлөөний бүх уулзварт камер суурилуулаад байгаа гэнэ. Түүнчлэн хяналтын камер нь автоматжуулсан системтэй учир дарга цэрэг гэж  хэнийг ч ялгалгүй зөрчлийг баримтжуулах давуу талтай аж.
Үүнд, тээврийн хэрэгслийг аль, замд, хэзээ, хэдэн км цагийн хурдтай, уулзварт хэдэн цагт улаан гэрлээр нэвтэрснийг зураг болон бичлэгээр баталгаажуулах юм байна.