УИХ-ын хаврын чуулган завсарлаад 20 гаруй хонож байна. Чуулган завсарласан өдрүүдэд зарим гишүүн тойрогтоо ажиллахын зэрэг­цээ хуулийн төсөл боловс­руулж байгаа бол ихэнх нь амарч буй аж. Долдугаар сар амралт, зугаалгын үе байдаг учир төрийн бай­гуул­лагууд ч “амралт”-ын бай­далтай байгаа билээ. УИХ-ын зарим гишүүн хаа­на, юу хийж байгааг хүргэе.




Энэ жил дөрвөн аймгийн түүхт ой тохиосон учир УИХ-ын зарим гишүүн энэ зуныг найр наадам хэсч, хөдөө гадаа амарч өнгөрөөж байна. Долдугаар сарын сүүлээр аймгуудын ой болж, гишүүдийн цуваа ч тэр зүг рүү хөвөрсөн. УИХ-ын гишүүн О.Содбилэг, Я.Санжмятав нар Завхан аймгийн ойд оролцсон бол Н.Батбаяр, Б.Болор нарын гишүүд төрөлх Архангай нутгийнхаа ойн баярын хойморт сууж харагдана билээ. Тэд найр наадам үзэхийнхээ зэрэгцээ тойрогтоо ажиллаж байгаа гэнэ.







УИХ-ын гишүүн С.Ганбаатар чуулган завсарлангуут бүтэн жилийнхээ алжаал ядаргааг тайлж, улс төрийн ажлаас түр хөндийрөхөөр Архангай аймгийн Чулуут суманд зусаж буй хадмындаа очихоор явжээ. Тэрээр гэр бүлийн хамт эрүүл агаарт хонь мал эргүүлсэн шигээ амарч буй гэнэ. Энэ сарын сүүлээр буюу хүүхдүүдийнхээ хичээл сургууль орох үеэр Улаанбаатарт ирж, ажилдаа орох аж. УИХ-ын намрын чуулганаар түүний санаачилсан Хүүхэд харах үйлчилгээ, Эрүүл мэндийн даатгалын тухай хуулийн төслийг хэлэлцэх учир тэрээр ажлын хэсгийнхэнтэй нэлээд сууж ажиллах юм байна.


УИХ-ын гишүүн С.Дэмбэрэл хаврын чуулган завсарласан өдрүүдэд МҮХАҮТ-д ажиллаж байгаа гэнэ. Тэрээр тус танхимын даргын албыг давхар хашдаг.
Энэ сарын 20-22-нд БНХАУ-ын Эрээн хотноо Хятад-Монгол-ОХУ улсын худалдаа, эдийн засаг, хамтын ажиллагааны “Эрээн-2013” чуулга уулзалт болох юм байна. Хөрш хоёр оронтойгоо хамтын ажиллагаа, худалдааны нягт холбоотой манай улсын хувьд энэхүү чуулганд ихээхэн ач холбогдол өгч оролцдог билээ. Чуулганыг Монголын талаас МҮХАҮТ бизнес эрхлэгчдээ зохион байгуулан оролцдог учраас тэрээр энэ ажилд ханцуй шамлан ороод буй аж.


Хаврын чуулган зав­сар­ла­сан өдрүүдэд гишүүд нутаг, нутгийн зүг мордон амарч буй энэ үед УИХ-ын ги­шүүн О.Баасанхүү л ганцаа­раа ажиллаж байна. Тэрээр УИХ-ын гишүүний тангаргаа өн­гөрсөн оны найм­дугаар сарын 1-нд өргөсөн учраас Хө­дөл­мөрийн хуулийг ягштал биелүүлэхийн тулд амраагүй гэдгээ хэлж байв. Тиймээс дол­дугаар сарыг дуустал ажил­лаад өнөөдрөөс ээлжийн амралтаа авах юм гэнэ.
УИХ-аас баталсан хуулийг эрхэм гишүүд энэ мэтчлэн ягштал мөрддөг бол хэд, хэдэн гишүүн амрах бус ажиллах ёстой байж. Тухайлбал, УИХ-ын гишүүн О.Баасанхүүтэй цуг нэг өдөр Ц.Цолмон, түүнээс хойно Г.Батхүү, Д.Сарангэрэл, Д.Арвин нар тангаргаа өргөсөн.
Тэд ирэх арванхоёрдугаар сарын 13-нд, Ц.Оюунбаатар мөн сарын 18-нд тангараг өргөсөн учраас Хөдөлмөрийн хуулийн дагуу дараа жилийнхээ тухайн өдөр амрах байжээ.