Монгол Улсын Ерөнхийлөгч Ц.Элбэгдорж Намбарын Энхбаярт уучлал үзүүлжээ. Уучилна гэдэг бол “Та буруутай шүү, гэхдээ яахав үүнийг чинь уучилж байна” гэсэн үг.
Монгол төрийн хамаг л өндөр албан тушаал, Монгол Улсын Ерөнхийлөгч, УИХ-ын дарга, Ерөнхий сайд, эрх баригч намын тэргүүний алба хашиж явсан энэ хүн юутай ч Монгол төр, ард түмний өмнө буруу хэрэг хийсэн нь шүүхээр нотлогдож зохих ялаа эдэлж байгаад Төрийн тэргүүнээр уучлууллаа.
Энэ бол өнгөрсөн зургадугаар сард МАХН-аас Ерөнхийлөгчид нэр дэвшин өрсөлдөж, МАН-аас нэр дэвшсэн дархан аварга Б.Бат-Эрдэнийн саналыг хуваж өгсөн, ЭМ-ийн сайд Н.Удвалын “гавьяа зүтгэл”-ийг Ц.Элбэгдорж үнэлсэн хэрэг.
Нөгөө талаар Н.Энхбаяр гэдэг хүн Монгол төрийг зайдалж, бүхнийг дийлэн, харцаараа хөдөлгөж, авлигын загалмайлсан эцэг болтлоо өндөр авсныг таслан зогсоож, нэг үе дарж авсандаа сэтгэл ханасан хэрэг гэж бас болно. Түүний бор оймстойгоо баригдаад явж байгаа, бие нь муудаж, алийгаа алдан, уурлаж бухимдан эмч, хуулийн ажилтнуудыг загнаж, салаавч үзүүлэн шалдаа буусныг олон нийт харсан. Төрийн албан тушаалыг үнэ хаяалцуулан зарж, ард түмний хөрөнгийг намдаа, хувьдаа, гэр бүлдээ хэрхэн яаж гарын салаагаар урсгаж туйлж байсан хүн шоронгийн хоригдол, ялтан болоод ямар байдгийг бүх нийтээрээ харлаа.
Одоо тэр энгийн нэгэн иргэн. Гэхдээ МАХН-ын дарга. Үүгээрээ Монгол Улсын Засгийн газарт МАХН ирэх гурван жилд баталгаатай байж, нэг үгээр хэлбэл төр засаг тогтвортой байх баталгаа болж байна.
МАХН-аас Засгийн газарт байгаа ямар ч албан тушаалтан одоо элдэв долоон юм яриад байх нүүргүй боллоо. Тэдний сэтгэлийн ганц тээг нь намын дарга Н.Энхбаяр нь суллагдсанаар одоо ингээд үгүй болж байна гэсэн үг.
Харин одоо МАН гэдэг айл, тэдний зүтгэлтнүүд яахав. Энд тэндээс олж цуглуулсан, хурааж хумьсан бүхнээс нь хувь хишиг хүртэж, үгүй юм гэхэд Н.Энхбаярын өнгөн дээр гар хөлөөсөө хөтлүүлэн улс төр гэдэг их айлд орж ирэн, гар нь ганзаганд, хөл нь дөрөөнд хүрсэн олон хүнд Н.Энхбаяр яаж хандах бол, тэд Н.Энхбаярт хэрхэн хандах бол гэдэг нь сонин.
Тэдний хувьд Н.Энхбаярыг намаасаа явахад хүргэж, дараа нь ялтан болоод ачигдаад явж байхад “болж болж” гэж хэлээгүй ч,  өмгөөлж хамгаалж нэг ч үг дуугараагүй. Өөрсдөө л эхээс төрөхдөө ийм дарга даамал, сайд мяндагтан төрсөн юм шиг толгой дээгүүр алхацгааж байсан.
Чухам нарийн яривал уутлагч нь Намбарын Энхбаяр байсан болохоос биш уургалагч нь өнөөгийн МАН-ын гол гол мяндагтнууд байсан. Тэдний хийсэн нүглийг  хамгийн сайн мэдэж байсан хүн бол Н.Энхбаяр. Гэхдээ Н.Энхбаяр энэ бүхнийг шүүхийн өмнө дэлгээгүй. Үүгээрээ МАН-ын энэ олон  томцуул бүгдээрээ Н.Энхбаярт өртэй.
Тэд түүнийг хоригдол байхад “Намайг л битгий дурдчихаасай билээ. Энэ ч хэрэг маань илрэх болов уу, тэр ч булхай минь задрах болов уу” хэмээн нойргүй хонож байсан бол одоо “За өнөөдөх чинь гараад ирлээ шүү. За одоо хэзээ утасдах бол, юу гэх бол” хэмээн орондоо хөрвөөж өнжих  болж байна.
Чухамдаа тэдний хувьд Н.Энхбаярыг утасдахад “Чамд хамаагүй ээ. Дуугүй бай” гээд хэлчих бүдүүн зүрхтэй хүн нэгээхэн ч үгүй.
Н.Энхбаярыг суллагдах энэ мөчид МАН-ын Бага хурал, Их хурал болох гээд албан тушаалын том өрсөлдөөн болж, нууц хуйвалдаан ид өрнөж  байгаа үе таарч байна. Хэдийгээр өөр өөр нам болов ч намын дарга болчих гээд, хожим нам нь сонгуульд ялбал Ерөнхий сайд болчихно хэмээн сэрүүн зүүдэлж яваа хүн бүрийг өлгийтэй байхаас нь гэхэд юу юм, улс төрд нусаа татаад, боодолтой мөнгө бариад ирж байхаас нь Н.Энхбаяр бүгдийг нь хуу мэднэ.
Юутай ч Монголын улс төрд өөрийн гэсэн байр суурьтай, зангарагтай Н.Энхбаяр гэдэг нэгэн эрх чөлөөт иргэн боллоо. Үйл явдал яаж өрнөх юм бол доо.