“Монгол Улсын иргэнд газар өмчлүүлэх тухай” хуулиар Монгол Улсын иргэнд гэр бүлийн хэрэгцээний зориулалтаар газрыг нэг удаа үнэгүй өмчлүүлнэ гэж заасан байдаг. Иргэнд гэр бүлийн хэрэгцээний зориулалтаар өмчлүүлэх газар нь түүний байршил, зориулалтаас хамааран өөр өөр хэмжээтэй байх бөгөөд нийслэлийн иргэд 0,07га хүртэл хэмжээтэй газрыг нэг удаа үнэгүй өмчлөх боломжтой юм. Хууль хэрэгжиж эхэлснээс хойш өнөөдрийн байдлаар нийслэлийн хэмжээнд 93,291 иргэн газраа өмчлөн авчээ. Энэ нь нийт хүн амын дөнгөж 7,6 хувь юм. НИТХ-ын 2013 оны тавдугаар сарын 30-ны өдрийн 10/39-р тогтоолоор гэр бүлийн хэрэгцээний зориулалтаар иргэдэд нийслэлийн долоон дүүргийн 52 байршилд нийт 15309 га газрыг өмчлүүлэхээр тодорхой зааж өгсөн билээ.