Жил гаруйн өмнө Бага хурлаар МАН-ын дарга болж байсан Ө.Энхтүвшинг энэ удаад өөрийн хүсэлтээрээ тамгаа өгөхийг нь зөвшөөрсөнгүй. Дүрмийн да­гуу Их хурлаар албан ту­шаа­лаа авч өгөлцөхөөр болсон ч дараагийн даргын нэр аль эртээс дуулдаж эхэлж, бараг л өрсөлдөгчгүйгээр сонгогдох нь тодорхой гэх. Ө.Энхтүвшингээс халааг нь авах дарга М.Энхболд гэдгийг МАН-ынхан дуу нэгтэй хэлж байгаа. Хаа хаанаа ч үүнийг зөвшөөрсөн гэлцэнэ.
Гэсэн ч Бага хурлын үеэр түүнтэй өрсөлдөгч нэгэн өөрийгөө илчилсэн гэнэтийн үйл явдал болжээ. Хүн болгон шахуу М.Энхболдыг дэмжиж гүйж буй нь нэгэн эрхэмд таалагдаагүй бололтой. Увсын фракцыг толгойлогч Ц.Нямдорж намынх нь гишүүд хотынхны талд зогсоод буйд ихэд бухимдалтай байсан аж.
Бага хурлын зохион байгуулалтыг хариуцаж, ги­шүү­дээ цуглуулах ажил хариуцаж авсан М.Энхбол­дод дургүйцлээ ингэж илэрхийлжээ. Тэгэхдээ Бага хурлын үеэр цөөнгүй хүний нүдэн дээр Ц.Нямдорж М.Энхболдыг заамдаж авчээ. Хоёр дахь удаа МАН-ын дарга болох гэж хор найруулж, Бага хурлын гишүүдийг өөрийн талд дуугаргалаа хэмээн Ц.Нямдорж ууртай байсныг эх сурвалж хэлэв.
Хотын фракц МАН-ыг дараагийн жилүүдэд зангидаж явахаар болсонд тэрээр тааламжгүй хандаж буйгаа энэ үйлдлээрээ илэрхийллээ. С.Баяр болон бусад нь битүүхэндээ М.Энхболдыг балиашиглаж байгаа учир Увсын фракцад дэмжлэг муу байна гэсэн үг болж таарав. Гэхдээ тэрээр дараагийн даргад сэтгэл дундуур байгаа гэдгээ илэрхийлсэн болохоор МАН-ын XXVII Их хуралд намын даргад нэрээ дэвшүүлэн өрсөлдвөл гайхах хэрэггүй нь.
Одоогоор хотын фракцтай өрсөлдөхөөр Н.Энхболд, У.Хүрэлсүх нарыг нэр дэвшүүлж магадгүй гэсэн мэдээлэл бий. Зарим эх сурвалж У.Хүрэлсүхийг энэ таамагт байхгүй, харин ч М.Энхболдтой тохиролцож, дэмжихээр болсон гэж байна. Тэгэхээр энэ бол М.Энхболдыг МАН-ын олонхи нь, хэд хэдэн фракц дэмжиж, түүний хамгийн гол өрсөлдөгчөөр нь Ц.Нямдорж ба түүний нөхөд тодорч байна гэсэн үг юм. Бага хурлын өмнөхөн хэвлэлээр Ч.Хүрэлбаатарыг намын даргад өрсөлдөж, нэр дэвших бололтой гэсэн мэдээлэл явж байсан. Энэ бол цаагуураа Увсын фракц М.Энхболдыг зүгээр харж сууж байгаад намын дарга болгохгүй гэсэн битүүхэн дохио байж. Өрсөлдөх өрсөлдөхдөө Ч.Хүрэлбаатар ч биш фракцын гол хүн Ц.Нямдорж өөрийгөө сойж магадгүй нь.
МАН-ын яг өнөөдрийн нөхцөл байдалд Ц.Нямдорж шиг хатуу, чанга хүн нам толгойлоход гэмгүй гэх нь ч бий. Гэхдээ намын дарга гэдэг зөвхөн хатуу гараар үзэлцдэг хүн байхаасаа илүүтэй зөв удирдагч байж, олон ашиг сонирхлыг аль нэг тийш нь холбируулчихалгүй тэгшхэн барьж чаддаг байгаасай гэж хүсч, хүлээж буй нь олонхи. МАН-аас МАХН руу биш эсрэг урсгал хөврүүлнэ гэж байгаа учраас Н.Энхбаярын МАХН-тай хэл амаа ололцож чадах нэгэн намын дарга болох ёстой. Үүгээр ч зогсохгүй өөр олон асуудалд М.Энхболд, Ц.Нямдорж хоёрыг харьцуулан үзэж, багагүй шинжих нь мэдээжийн хэрэг.
Намрын налгар аравдугаар сарын 27-ны өдрийг хүртэл байдал хаашаа, яаж ч эргэж мэднэ. Өнөөдөр М.Энхболдыг дэмжиж явсан нэгэн маргааш Ц.Нямдоржийн талд гарахыг үгүйсгэхгүй. Хэдийгээр хотын фракцынхан нөлөө ихтэй байгаа ч чанга өрсөлдөгчтэй учирвал гэдэг тооцоог хийсэн болов уу. Увсын фракцад хаанаас дэмжлэг ирэх бол.
Аравдугаар сарын 27 хүртэл зай ч байна, лай ч байна. Тэр болтол фракцууд, нэр дэвшигчид ч бэлтгэлээ базааж л байг. Их хурлыг зүгээр ч нэг аравдугаар сарын сүүлчээр товлоогүй болов уу. Цаг хугацаа хожих хэнд нь илүү ашигтай вэ.