УИХ-ын гишүүн Г.Уянга Түрээслэгч нарын эрх ашгийг хамгаалах ТББ-ын тэргүүний албыг давхар хашдаг. Тиймээс бизнес эрхлэгчид түүний нэр дээр хаяглан гомдол ирүүлэх нь хэвийн үзэгдэл. Саяхан “Орхон” худалдааны төв түрээсийнхээ үнийг үндэслэлгүйгээр нэмсэн, ямар ч бичиг баримтгүйгээр их хэмжээний мөнгө авч, гэрээнд заасан үүргээ биелүүлээгүй, биелүүлэхийг шаардахаар түрээсийн байрнаас хөөдөг хэмээн түрээслэгчид гомдол мэдүүлжээ. Энэ дагуу УИХ-ын гишүүн Г.Уянга болон Шударга өрсөлдөөн, хэрэглэгчийн төлөө газар уг асуудлыг хянан шалгаж үзээд Түрээслэгч нарын эрх ашгийг хамгаалах хуулийг санаачлах хэрэгтэй гэсэн шийдэлд хүрчээ. Ямар ч үндэслэлгүйгээр түрээсийн үнийг нэмснээр өргөн хэрэглээний барааны үнийг автоматаар өсгөдөг учир энэ асуудалд хяналт тавьж ажиллахаа хэлж байв. Мөн тэрээр татвар төлөгч иргэдийн эрх ашгийг хамгаалахаар тууштай ажиллана гэдгээ мэдэгдсэн юм.