Оюутолгой компани 1700 ажилтнаа халж Монголын Засгийн газарт шахалт үзүүлэв. Энэ асуудлаас үүдэн өчигдөр Үндэсний аюулгүй байдлын зөвлөл хуралдлаа. Хуралдаан үе үеийн ҮАБЗ-ийн гишүүд оролцож, өөрсдийн байр сууриа илэрхийлж. Гэхдээ хэн ямар байр суурь илэрхийлсэн нь тодорхойгүй байна.
Ерөнхий сайдаар ажиллаж байсан Ш.Гунгаадорж, УИХ-ын гишүүн Ц.Нямдорж гээд олон хүн оролцож. Үүний дотор нэг хүн дутуу байсан нь Ерөнхийлөгч асан Н.Багабанди. Түүний үг энэ хуралдаанд нэн чухал байсан нь ойлгомжтой. Учир нь, Н.Багабанди Оюутолгой компанид Монголын талыг төлөөлөн сууж байгаа гурван монгол хүний нэг нь.
Тэгэхээр тус компанийн ТУЗ хуралдаж далд уурхайг ашиглахаа зогсоож, монгол ажилчдыг халах шийдвэр гарсныг Н.Багабанди үг үсэггүй мэдэх хүн. Тиймээс энэ хүний үг маш чухал гэдгийг хэн ч бодсон зүйл. Ард түмэн ч ерөнхийлөгч асан Н.Багабандийг өөрийн байр сууриа илэрхийлээсэй гэж хүсч байна. ҮАБЗ-д оролцож болсон байдлыг хэлдэггүй юм аа гэхэд ядаж “ТИТЭМ ҮГ”-ээрээ дамжуулж монголчууд хийгээд Монголын Засгийн газар Рио Тинтогийн шахалтаас хэрхэн гарах, ямар арга зам байгааг өөрийнхөө байр сууринаас илэрхийлмээр санагдана.