Хүүхэлдэйн театр намрын үзвэрийн нээлтээ ОХУ-д суралцаж буй монгол оюутнуудын тайлан тоглолтоор эхлүүлсэн билээ. Театртаа болон үзэгчдэд тайлангаа хүргэсэн арван оюутан БШУЯ, тус театрын захиалгаар ОХУ-д 100 хувийн тэтгэлгээр суралцдаг аж. Тус театрын илгээсэн анхны багийн охид, хөвгүүд өдгөө Санктпетербургийн театр урлагийн академийн гурав­дугаар дамжаанд суралцаж буй бөгөөд ирэх жил сургуулиа төгсч, театртаа ирэх аж.
Олон жилийн өмнө УДЭТ-ын захиалгаар хойд хөршид ийн оюутнуудыг тэтгэлгээр суралцуулж байсан ба тэдний дунд гавьяат жүжигчин Б.Жаргалсайхан, У.Уранчимэг нарын авьяаслаг жүжигчид багтаж байсан юм. Дашрамд, Хүүхэлдэйн театрын уран бүтээлчид дөрвөн жилийн өмнөөс орон нутгийн хүүхэд, багачуудад хичээлийн шинэ жилийн эхний өдрүүдэд уран бүтээлээ хүргэдэг болсон юм.
Энэ аяллынхаа хүрээнд тун удахгүй тэд алс баруун хязгаарыг зорьж, Баянхонгор, Ховд, Увс, Говь-Алтай, Завхан, Архангай, Өвөрхангай аймгийн бяцхан үзэгчдэд “Бяцхан хатагтайн хүүхэлдэйн театр”, “Чоно ба долоон ишиг”, “Өнхрүүш” жүжгээ хүргэх гэнэ.