Цаг уур орчны шинжилгээний газраас ойрын өдрүүдэд усархаг бороо орж, гол мөрний усны төвшин огцом нэмэгдэх учраас иргэдийг үер усны аюулаас сэрэмжлэхийг анхаарууллаа. Тус газрынхны мэдээлснээр Хөвсгөлийн уулсаас эхтэй Дэлгэрмөрөн, Бэлтэс, Үүр, Шишхэд зэрэг голын усны төвшин өмнөх өдрийнхөөс 10-70 см, Хангай нурууны Чулуут, Түй, Шаргалжуут, Онги голын дагууд усны төвшин хоногт 10-27 см, Хэнтэй нуруунаас усжих Хараа гол Дархан хот болон Хэрлэн гол Багануур дуурэг орчмоор 5-10 см, Сэлэнгэ мөрний нийт уртын дагууд болон Орхон голын эхээр усны төвшин хоногт 5-30 см даван үерлэх хандлагатай байгаа гэнэ.
Тиймээс голын эрэг дагуу зусч буй ард иргэд, аж ахуйн нэгж, байгууллага, аялал зугаалгаар явж, амарч буй иргэдийг үер усны аюулаас онцгойлон сэрэмжилж, үр хүүхдээ голын эргийн дагуу тоглуулахгүй байхыг нийт эцэг, эхчүүдэд онцгойлон анхааруулж байна гэлээ.