Эдийн засгийн нөхцөл байдал таагүй байгаа энэ үед гарц эрэлхийлэх үүднээс УИХ-ын ээлжит бус чуулганыг хуралдуулахаар болсон. Чуулганаар ирэх сарын дундуур хуралдуулахаар төлөвлөсөн байна. Эцсийн тов хараахан гараагүй ч чуулганаар хэлэлцэх асуудууд тодорхой болжээ. Тухайлбал, Хөрөнгө оруулалтын тухай хуулийг хэлэлцэж, гадаадын хөрөнгө оруулагчдад таатай байдлаар нэмэлт, өөрчлөлт оруулах юм байна. Засгийн газраас боловсруулсан уг хуулийн төслийг УИХ-аар баталбал Стратегийн ач холбогдол бүхий салбарт үйл ажиллагаа явуулж буй аж ахуйн нэгжид гадаадын хөрөнгө оруулалтыг зохицуулах тухай болон Гадаадын хөрөнгө оруулалтын тухай хууль үйлчлэхгүй болох юм.
Өөрөөр хэлбэл, хөрөнгө оруулалттай холбоотой бүхий л асуудлыг Хөрөнгө оруулалтын тухай шинэ хуулиар зохицуулах аж. Мөн ээлжит бус чуулганаар Эдийн засгийн хүндрэлийг даван туулах арга хэмжээ авах тухай УИХ-ын тогтоолын төслийг хэлэлцэх гэнэ.