МАН-ынхан “Монгол Улсын хөгжлийн загвар” сэдэвт шилдэг бүтээлийн уралдааныг эрдэмтэн, судлаачдын дунд зарлаж байгаагаа өчигдөр сэтгүүлчдэд дуулгалаа. Эрдэмтдийн бүтээлийг энэ сарын 20-ноос ирэх аравдугаар сарын 1-н хүртэл хүлээн авах юм байна. Уралдаанд ирүүлэх бүтээл тодорхой үндэслэлтэй, тооцоо судалгаатай байх шаардлагатай бөгөөд ирсэн бүтээлийг үндэслэн “Үндэсний хөгжлийн цогц бодлого”-ыг боловсруулах аж. МАН өнгөрсөн УИХ-ын сонгуулийн үеэр дээрх бодлогыг 2030 он хүртэлх хугацаатайгаар боловсруулж, хэрэгжүүлэхээр амлаж байжээ. Гэвч сонгуульд ялагдсанаар уг бодлогыг хэрэгжүүлэх боломжгүй болсон юм. Гэсэн хэдий ч тус намынхан сөрөг хүчний байр сууринаас уг бодлогоо хэрэгжүүлэхийн төлөө ажиллана гэдгээ хэлж байв.

Өөрөөр хэлбэл, эрдэмтэд тухайн ажилладаг салбар бүртээ тулгамдаж буй асуудлыг хэрхэн шийдвэрлэх, цаашид яаж хөгжүүлэх талаар илтгэлдээ бичих юм. Тэрхүү илтгэлээс гарсан шилдэг санаануудыг нэгтгэн цогц бодлого боловсруулах аж. Энэ хүрээнд эрдэмтдийн дунд дээрх уралдааныг зарласан бөгөөд 20 сая хүртэлх төгрөгийн шагналын сантай гэсэн. Хурлын үеэр тус намын гишүүд “Монгол Улс нэгдсэн цогц бодлоготой байх ёстой. Ийм бодлогуудыг боловсруулж байсан ч үе, үеийн УИХ хэлэлцэж байгаагүй” гэв.