ШУТИС-ийн салбар сургуулиудын оюутны холбоо сургалтын төлбөр 13,9 хувиар нэмэгдсэнээс болж хэвлэлийн хурал хийлээ. Холбооныхон сургуулийн төлөөлөн удирдах зөвлөлийн дарга Т.Одхүү болон бусад  холбогдох бүрэлдэхүүнтэй уулзаж, удаа дараалан албан тоотоор хүсэлт санал хүргүүлсэн ч  "төлбөр нэгэнт нэмэгдсэн учраас Та нарын санал бодол бидэнд чухал биш” гэсэн хариу сонссон гэнэ.

Ашиглах боломжгүй багаж хэрэгсэл, тоног төхөөрөмжтэй, дусаал гоожиж, хана тааз нь мөөгөнцөртсөн анги танхимд оюутнууд хичээлээ хийж  байхад захиргаа удирдлагууд төлбөр нэмснээр өөрсдийнх нь өрөө тасалгаа л өнгө орохоос оюутнуудын сурч боловсроход ямар нэгэн ахиц гараагүй тухай бухимдаж байгаа юм.

Сүүлийн гурван жилийн туршид сургалтын төлбөрийг нийт 46 хувиар нэмэгдсэн боловч сургалтын орчин болон чанарт ямар нэгэн ахиц өөрчлөлт гараагүйг оюутнууд ярьж байна. Тиймээс сургуулийн удирдлагууд оюутнуудынхаа санал хүсэлтийг сонсож, хэлэлцэхгүй тохиолдолд тэмцлийн дараагийн хэлбэрт шилжинэ гэж зөвлөлийнхөн хэлсэн юм.