“Дайны эрсдэлийн сан” нэрээр зорчигчдын тийз бүрт таван ам.доллар нэмж авах замаар их хэмжээний мөнгө цуглуулж, түүнийгээ гадаадын банкинд нээсэн дансандаа цуглуулж хувьдаа завшсан хэрэгт МИАТ-ийн экс удирдлагуудыг буруутгаж буй. Тэдэнд анхан шатны шүүхээс 10-14 жилийн хорих ял эдлүүлэх шийдвэр гарсан ч үүнтэй санал нийлэхгүй давж заалдсан юм. Харин тэдний гомдлыг Нийслэлийн шүүх өчигдөр хэлэлцээд шүүхийн зүйл заалтыг зөв хэрэглэж, тэдний үйлдсэн хэрэгт тохирох ял шийтгэл оногдуулсан байна гэж үзэн анхан шатны шүүхээс оноосон ялын хэмжээг хэвээр үлдээлээ. Анхан шатны шүүхээс МИАТ-ийн захирал асан Б.Эрдэнэбилэгт 14 жил нэг сар, Б.Бат-Эрдэнэд 12 жил нэг сар, Ц.Орхонд 11 жил, дэд захирлаар ажиллаж байсан Ч.Хоролсүрэнд 13 жил нэг сар, Ч.Хоролсүрэнгийн дүү “Монголиан эйрлайнс” группын захирал асан Ч.Суурьтогтоход 10 жил нэг сар, 1997-2007 онд “Голомт” банкны зургадугаар салбарын захирлаар ажиллаж байсан Г.Саранчимэгт 11 жил нэг сарын хорих ялыг оноосон билээ.