Долоо хоног бүрийн эхний өдөр нийслэлд болон улс оронд өрнөж буй бүтээн байгуулалтын явцын талаар мэдээлэл сонсдог “Бүтээн байгуулалтын цаг”-т Ерөнхий сайд Н.Алтанхуяг зарим салбарын сайд нар, албан тушаалтнаас мэдээлэл авлаа. “Бүтээн байгуулалтын цаг” уулзалтад ЗГХЭГ-ын дарга Ч.Сайханбилэг, Зам тээврийн сайд А.Гансүх, Барилга хот байгуулалтын сайд Ц.Баярсайхан, Эрчим хүчний сайд М.Сономпил нар оролцов. Мөн нийслэлийн Засаг даргын Зам, тээвэр, дэд бүтцийн асуудал хариуцсан орлогч Н.Гантөмөр, ҮХААЯ-ны Төрийн нарийн бичгийн дарга Х.Золжаргал, ЗТЯ-ны Төрийн нарийн бичгийн дарга Б.Батзаяа, ЭЗХЯ-ны Төрийн нарийн бичгийн дарга Б.Шинэбаатар, “Гудамж” төсөл хэрэгжүүлэх нэгжийн захирал Б.Батболд нар мэдээлэл өгсөн юм.

Зам тээврийн сайд А.Гансүх шинэ төмөр замын ажлын явцтай танилцаад ирсэн байна. Ухаа худаг-Гашуун сухайт чиглэлийн төмөр замын төсөлд 1100 хүн, 600 техник ажиллаж байгаа аж. Оны эцэс гэхэд 900 орчим техниктэй ажиллахаа төслийн гүйцэтгэгч “Samsung C&T” компанийнхан хэлжээ. Гашуун сухайтын боомтод нарийн царигаар төмөр зам тавих учир цэгийг тодорхойлохоор гурван хувилбар гаргасан байна. Тухайн зам барих хэсэгт Дархан цаазтай газар нутаг хамарч байгаа учир судалгаа хийж, Хятадын талтай ярилцахаар болсон гэнэ. Энэ долоо хоногт уг боомтод очиж ажиллана гэдгээ салбарын сайд хэллээ. Төмөр замын трассын дагуу айлуудын өвөлжөө орсон учир нүүлгэж, шилжүүлэхийг аймаг, орон нутгийн удирдлагуудад дуулгажээ. Өнгөрсөн долоо хоногт Чойр-Сайншанд чиглэлийн авто замыг нээсэн бол удахгүй Замын-Үүд-Сайншандын авто замын ажлыг дуусгах юм байна. Үүний дараа Дундговийн авто замыг ашиглалтад оруулах аж. Тиймээс энэ сарын сүүлчээр зам засварын ажлуудыг явж шалгахаар болжээ. Нийслэлтэй хатуу хучилттай авто замаар холбогдох аймгуудын нэг Өмнөговийн ажилд саад учраад байгаа аж. 40 км замын ажлыг 20, 20 км-ээр нь гүйцэтгэх хоёр компани хийж чадахгүй хэмээн мэдэгдэл хүргүүлсэн учир хариуцах эзэнгүй болжээ. Хөвсгөлийн замын ажилд Кувейтийн сантай зарим нэг зүйл ярилцах шаардлага гарсан учир хариу ирэхийг хүлээж байна гэв. Цонжин болдог хүртэлх авто замын 19 км-ийг хучсан бол 5 км нь дутуу байгаа ч гэрээнд заасан хугацаа болох энэ сарын 30-ндаа амжиж ажил дуусна гэдгийг хэллээ. Гэхдээ цаг агаар таатай байвал хучилтаа бүрэн хийгээд энэ сарын 15-ны үед хөдөлгөөнийг нээх боломжтой гэсэн юм.

Уг төслөөр өргөтгөж, шинэчилсэн таван уулзварын ажил дууссан байна. Одоогоор Гэмтлийн эмнэлгийн уулзвар, 25 дугаар эмийн сангийн уулзвар, ТЭЦ III –Яармагийн зам, Циркийн арын уулзварыг засч байгаа гэлээ. Циркийн уулзварт өдөртөө ажил хийх боломжгүй байгаа учир удаашралтай яваа аж. Туул голын дагуух хурдны замын трасс батлагдсан бол Сэлбийн голын замынТЭЗҮ-ийг хийж буй гэнэ. 14 хоногийн дараа гэхэд ажлууд эхэлсэн байх болно гэж “Гудамж” төсөл хэрэгжүүлэх нэгжийн захирал Б.Батболд хэлсэн юм.
Өргөтгөж буй Яармагийн замыг энэ долоо хоногт ажлаа дуусгаж хөдөлгөөнийг нээхээр төлөвлөжээ. Нисэх-Шувуун фабрикийн чиглэлийн 22.5 км замын ажлын гүйцэтгэл сайн байгааг Нийслэлийн Засаг даргын орлогч Н.Гантөмөр энэ үеэр хэлэв. 

Эрчим хүчний сайд М.Сономпил энэ сарын сүүлчээр хийсэн ажлуудаа нэгтгэж дэлгэрэнгүй мэдээлэл өгнө гэж мэдээллээ эхлэв. Энэ жил эрчим хүчний хэрэглээ 8-12 хувиар өссөн байна. Өнгөрсөн зургадугаар сард ашиглалтад орсон Салхитын салхин станц шөнөдөө хүчин чадалтай сайтай 32-42 мвт эрчим хүч үйлдвэрлэж байгаа гэнэ. ТЭЦ III-ыг өргөтгөх ажил хэвийн явж буй учир арванхоёрдугаар сарын 1-нд ашиглалтад орох юм байна. Өргөтгөлийн ажил дуусахад 50 мвт-ын хүчин чадал нэмэгдэнэ. Ирэх жил ТЭЦ IV-ийг өргөтгөж 100 мвт-ын хүчин чадал нэмнэ гэж төлөвлөжээ. Харин V цахилгаан станцын газар чөлөөлөх ажил 30 хувьтай яваагаас гадна яндангийн суурийн цутгалт дуусч буйг сайд хэлэв. Амгаланд барьж буй дулааны станц ирэх намар гэхэд дуусч, ашиглалтад орох юм байна. Мөн Оюу толгойд Хятадаас цахилгаан авахаар болсоныг тэрээр хэлсэн юм.

Орон сууцны зээлтэй байсан 15 мянган хүнийг найман хувийн хүүтэй зээлд шилжүүлсэн байна. Харин 6304 хүн шинээр найман хувийн хүүтэй зээлд хамрагджээ. 2013-2014 онд нийтдээ 37 мянга орчим орон сууц ашиглалтад орно гэсэн тооцоо байгаа ч үүнээс илүү барилга баригдаж байгаа гэнэ. Тиймээс БХБЯ-наас ямар байршилд, хэдэн орон сууц, ямар үнээр баригдаж буй нарийвчилсан тоо гаргахаар ажиллаж байгаа гэж салбарын сайд Ц.Баярсайхан мэдээлэл өглөө. Түрээсийн орон сууцны талаар хөтөлбөр тус яамнаас боловсруулж байгаа аж.
Мэдээлэл сонсоод Ерөнхий сайд зарим зүйлийг лавлаж, тайлбар өгч байсан юм. Тухайлбал, дөрвөн жилийн хугацаанд барьсан авто замаас 400 км-ээр илүү замыг энэ жил тавьж байгаа. ТЭЦ-III хүчин чадлыг 148 мвт гэж үзэхэд ТЭЦ-III-ын өргөтгөлийн 50 мвт, Салхитын салхин станцын 40 мвт, ТЭЦ IV өргөтгөлийн 100 мвт-ыг нийлүүлбэл дахин нэг станцтай дүйцэхүйц хүчин чадал нэмэгдэж байна гэлээ. Харин “Гудамж” төслөөр гүйцэтгэсэн зарим уулзвар замын ус зайлуулах шугам муу байгааг Ерөнхий сайд холбогдох албаныханд анхаарууллаа. Саппорогийн уулзварт ус шингээх байгууламж тусад нь барихаар болсоныг тус төслийнхөн тайлбарлав.
Ингээд энэ долоо хоногийн “Бүтээн байгуулалтын цаг”-аар дээрх мэдээллүүдийг сонсч, асуудал, бэрхшээлийг хэрхэн шийдэж буйг лавлаж, бүтээн байгуулалтын ажилдаа илүү анхаарч ажиллахыг холбогдох албаныханд анхааруулснаар өндөрлөлөө.