Зам, тээврийн сайд А.Гансүх өнгөрсөн амралтын өдөр Ухаа худаг –Гашуун сухайт чиглэлийн 267 км төмөр замын ажилтай танилцах үеэр шинэ төмөр зам дайран өнгөрч буй Өмнөговь аймгийн Ханбогд, Баян-Овоо, Цогтцэций сумдад “Монголын төмөр зам” ТӨХК-иас зохион байгуулсан төслийн нээлттэй өдөрлөгт хүрэлцэн ирж, нутгийн иргэдтэй уулзлаа. Шинэ төмөр зам нь тус аймгийн гурван сумын нутгийг хамарч байгаа учир зарим малчин он удаан жил идээшиж дассан нутаг усаар нь төмөр зам дайран өнгөрч буйд дургүйцэх болсон гэнэ. Тиймээс салбарын сайд нь нутгийн иргэдтэй уулзаж улс оронд өрнөж буй төмөр замын бүтээн байгуулалтын ажлын ач холбогдлын талаар тайлбарлаж өглөө. Ингэснээр нутгийн иргэд Шинэ төмөр зам төслийн талаар зөв ойлголттой болж энэ ажилд нааштай хандах болжээ.