Ардчилсан намд нэгэн жигүүр ургажээ. Энэхүү жигүүр нь энэ сарын 16-нд анхны хурлаа хийж ерөнхий зохицуулагчаар УИХ-ын гишүүн асан А.Муратыг сонгосон байна. Мөн Ардчилсан намын удирдаж буй Шинэчлэлийн Засгийн газарт олон нийтийн өгч буй үнэлэлт дүгнэлтийг хэлэлцэж чиглэл гаргажээ. Ардчилалд итгэж саналаа өгсөн сонгогчид эдийн засгийн хямрал, төрийн нүсэр бүтэц хэвээр оршиж байгаад бухимдалтай хандаж байгаа юм.
Жигүүрийг Ардчилсан намын үндэсний зөвлөлдөх хорооны нэр бүхий гишүүд дэмжин хамтран ажиллахаа илэрхийлжээ. Тухайлбал, МоАХ, Кроун, Нэг-Ардчилал, Зүүн хойд Ази, МҮДН, Алтангадас, Ардчилсан залуучуудын холбоо зэрэг фракцийн төлөөлөл, нөлөө бүхий улстөрчид нэгдсэн байна. Энэ нь Ардчилсан намд багагүй хөдөлгөөн, тэмцэл бий болохыг илтгэж буй хэрэг гэнэ. Энэ өвөл гэхэд Засгийн газрын хариуцлагагүй ажилласан хоёр, гурван сайдыг огцруулах тухай ч яригдаж байгаа бололтой. Ийнхүү шинэ жигүүр байгуулагдаж, энэ долоо хоногт олон нийтэд зарлах юм байна.