“Гал үндэстэн” холбооныхон энэ сарын 16-нд Төрийн тусгай хамгаалалттай бүс болох Төрийн ордон руу галт зэвсэгтэй нэвтэрч, саатуулагдаад байгаа билээ. Тэднийг Төрийн ордны хойд талын цэцэрлэгээс саатуулахад ангийн зориулалттай эскыз, сайга буу хоёр, 7.62 мм-ын сум 36, байлдааны гранат буюу гар бөмбөг есөн ширхэгийг хурааж авсан. Тэгвэл Ц.Мөнхбаяр тэргүүтэй зургаан хүнд холбогдох хэргийг үргэлжлүүлэн шалгах явцад гранат 11, гранат тэслэгч 10, сайга буу нэг, гар буу нэг, том, жижиг сум 101, тротил 18, титонатри ес, бууны замаг нэгийг нэмж илрүүлснийг Тагнуулын ерөнхий газраас мэдээлэв.
Гэхдээ энэ зэвсгийг хаанаас авсан эсэх нь мөрдөн байцаалтын нууцтай холбоотой болохоор хэлэх боломжгүй гэсэн юм.