Ардчилсан намд даль жигүүр ургаж, Шинэчлэлийн Засгийн газарт ажиллаж байгаа хэд, хэдэн сайдад хариуцлага тооцох болсон тухай мэдээлэл гарах болсон. Эл жигүүрт УИХ, Засгийн газрын гишүүнээр ажиллаж байгаа 20 гаруй хүн орж, удирдах зөвлөлд багтсан гэх. Тэр дундаа сонгуульд ялагдаж, ажил албан тушаалгүй хоцорсон УИХ-ын гишүүн асан Л.Гүндалай, Ерөнхий сайдын шахаанаас болж ажлаасаа халагдсан УИХ-ын гишүүн асан Ц.Сэдванчиг зэрэг хүмүүс байгаа гэх мэдээлэл ч олны дунд ам дамжин яригдаж буй. Энэ талаар УИХ-ын гишүүн асан Л.Гүндалайгаас тодруулсан юм. Жич: Түүнээс ярилцлага авахыг хүсч мэссеж бичсэн боловч Л.Гүндалай над руу дугаар андуурч залгаж, энэ далимд түүнээс цөөн асуултад хариу авсан юм.

-Та над руу дугаар андуурч залгажээ. Би танаас ярилцлага авахыг хүсч мэссеж бичсэн хүн байна?
-Өө тийм үү. Ах нь дугаар андуурч уучлаарай. Ах нь сонин хэвлэлд ярилцлага өгөхгүй байгаа ш дээ. Зарим телевизээс над руу ярьж, “Таныг мартагдсан хүн” буландаа оруулъя гэж л байдаг юм. Би ямар ч хэвлэлд ярилцлага өгөхгүй.
-Нэгэнт холбогдсоных танаас нэг зүйлийг тодруулах гэсэн юм. Сүүлийн үед Ардчилсан намд жигүүр ургасан тухай мэдээлэл гарсан. Жигүүрийн бүрэлдэхүүнд таныг явж байгаа гэх мэдээлэл байна?
-Үгүй ээ. Би тэнд нь ороогүй. Над руу ярьж л байсан. Би нэг, хоёр жилдээ улс төрөөс хол байна гэдгээ хэлсэн.
-Яах аргагүй л таныг байгаа гэсэн дээ. Ажил, албан тушаалгүй үлдэж, намдаа гомдсон болохоор таныг орсон гэх бор шувуу нисч байна?
-Үгүй, үгүй. Ажлын хэрэг ч алга.
-Та тэгээд юу хийж байна даа?
-Амраад л байна. Гадуур, дотуур яваад л...
-Сонгуулиас хойш та хэвлэлээр өөрийн дуу хоолойгоо хүргэсэнгүй. Ер нь, нэг ил гарах цаг болчихсон юм биш үү?
-Тийм ээ. Ах нь нам гүм байгаа. Цаг нь болохоор дуугарна аа. За баяртай.