УИХ-ын гишүүн Ц.Оюунбаатар “Өршөөлийн тухай хууль” санаачилснаа сэтгүүлчдэд мэдээллэв. Өнөөдөр Монгол Улсад 8000 гаруй хоригдол хорих ангиудад ял эдэлж байгаа нь байр савандаа багтахгүй байдалд хүрээд байгаа аж. Тиймээс энэ хуулийг санаачлах шаардлага байгаа гэнэн. Эл хуулийн төслийг өнгөрсөн хоёрдугаар сараас эхлэн санаачлан боловсруулж, хаврын чуулганд өргөн барьж хэлэлцүүлэх гэсэн ч амжаагүй учир намрын чуулганаар хэлэлцүүлэхээр болжээ. Хууль санаачлахад УИХ-ын гишүүдийн олонхи нь дэмжин оролцжээ. Тэрчлэн хуульч, судлаач, эрдэмтдийн саналыг энэ хуулийн төсөлд шингээсэн нь хууль нэлээд чамбайрсан гэдгийг хууль санаачлагч Ц.Оюунбаатар хэлсэн юм.
Өмнө нь энэ хуулийг Ерөнхийлөгч, Засгийн газрын зүгээс УИХ-д өргөн мэдүүлж хэлэлцүүлдэг байсан бол энэ удаа УИХ-ын жирийн гишүүд санаачилж байгаагаараа онцлогтой гэнэ.
Мөн энэ хуулийг боловсруулахдаа өмнө нь хэрэглэгдэж байсан хуулиас сайн зүйлийг нь авч, өмнөх хуулийн муу зүйлүүдийг засч залруулах байдлаар боловсруулсан гэдгийг хэлж байв.
Ийнхүү энэ хуулийг баталсанаар 3000 гаруй хүн шоронгоос өршөөлөөр суллагдаж, улсын төсвөөс 12 тэрбум төгрөгийг хэмнэнэ гэдгийг хууль санаачлагч гишүүд хэлж байлаа. Хууль батлагдаж хүмүүсийн олноор нь суллагдахаар нь зүгээр орхихгүй, тэднийг ажлын байртай болгох талаар нь анхаарч, дахин гэмт хэрэг үйлдэхгүй гэх баталгааг өөрсдөөр нь бичгийн хэлбэрээр авах юм байна. Энэ асуудлыг хуульд тусгаагүй ч журам хэлбэрээр хэрэгжүүлж болно гэсэн юм.