Хилийн чанадад зорчиж буй манай иргэд гадаад паспортныхаа хүчинтэй хугацааг зургаан сараас багагүй байлгах ёстойг нягталж шалгаагүйн улмаас хүндрэл учирч, паспортоо сунгуулахын тулд нислэгээ хойшлуулах, цаг хугацаа алдах зэрэг асуудалтай тулгарч байгаа гэнэ. Ялангуяа, Хонконгийн олон улсын нисэх буудлаар дамжин гуравдагч орнууд руу буюу Тайланд, Индонез, Сингапур, Малайз зэрэг Зүүн өмнөд Азийн орныг зорьж буй иргэдийн дунд паспортын хүчинтэй хугацаа хангалтгүй зөрчил удаа дараа гарсаар байгааг Хонконг дахь консулын газраас анхааруулжээ.
Иймд, хилийн чанадад зорчих гэж буй иргэд паспортныхаа хүчинтэй хугацааг нягталж шалгах, зургаан сар хүрэхгүй байвал сунгуулах, онгоцны тийз борлуулагч компаниуд тийз бичихдээ зорчигчдод энэ талаар анхааруулж байхыг Монгол Улсын Гадаад харилцааны яамнаас сануулж байна.