Энэ сарын 26-нд Сүхбаатар дүүргийн нэгдсэн эмнэлгийн хүүхдийн хүлээн авах тасагт гүн хордлоготой ирсэн гурван настай Т.Маралжингоо охин 30 цагийн турш эмнэлгийн тусламж авч чадаагүйн улмаас харамсалтайгаар амь насаа алдсан талаархи түүний ээжийн бичсэн захидлыг бид “Сайдад хаягласан зовлон нэвчсэн захидлын ард...” гэсэн гарчигтайгаар өчигдрийн дугаартаа нийтэлсэн билээ. Чухам яагаад “захидлын ард” хэмээн онцолсны учир гэвэл араас нь эрүүл мэндийн салбарынхан маань ахиад ийм гашуун явдлыг битгий давтаасай, нэгэн айлын, нэгэн гэр бүл төдийгүй ард түмэн тань та бүхэнд итгэл алдрах нь гэдгийг сануулж анхааруулахыг хүссэн юм.
Мөн Эрүүл мэндийн яамны бичиг хэрэгт очсон захидал гурваас дөрөв хоногийн дараа сайдын ширээнд очдог гэдгийг сэтгүүлч бид мэддэг учраас энэ удаад сониноороо дамжуулан шууд хүргэхийг хүссэн билээ.  Тийм ч учраас “хаягласан эзэндээ хүрч амжаагүй захидал” гэж онцолсон шүү сайд аа. Өчигдөр Эрүүл мэндийн яамнаас энэ асуудлыг сураглахаар очоод амаа алгадуулаад л буцав.
Сайд дарга нар нь “ай­маар” ажилтай байгаа учраас дуулаагүй, сонсоогүй гэнэ. 27-нд болсон хэргийн талаар юу ч сонсоогүй бас мэдээлэлгүй байгаа учраас асуултад хариулах боломжгүй гэлээ. Тиймээс Эмнэлгийн тусламж үйлчилгээний төвөөс лавла гэж зөвлөв. Үнэхээр харамсалтай л юм. Арван цэнгийн шижир алт аль нэг эмнэлгээс нь олджээ гэсэн мэдээ түгвэл аль хэдийнэ олоод уншчихсан, мөнгө болгоод зарцуулах зүйлээ магад тооцоолчихсон суух байлаа.
Эрүүл мэндийн яам энэ талаар тодорхой мэдээлэл өгтөл бид эмч, сувилагчид тооцсон хариуцлагын талаар нэхэн сурвалжлах болно.
Харин Сүхбаатар дүүргийн эрүүл мэндийн нэгдлийнхэн буруугаа ойлгоод шөнө болтол хуралдаж, хэнд ямар хариуцлага тооцох талаараа зөвлөлдсөн дуулдлаа. Биднийг үдээс хойш очиход хурал хэдийнэ таржээ.
Энэ сарын 26-27-нд шил­жих шөнө ээлжинд гарсан хоёр сувилагчийг гэмтнээр тод­руулаад ажлаас халчихсан тухай­гаа эмнэлгийн дарга М.Чимгээ ярьж сууна.
Сувилагч Л.Оюунгэрэл, Н.Сувд-Эрдэнэ нарыг ажлаас халж, алдаа гаргасан хүнд ха­риуц­лага тооцож чаддаг гэдгээ харуулсан гэнэ. Харамсалтай нь, шөнийн жижүүртэй байт­лаа орой ирсэн хүүхдээ эр­гэж үзээгүй, бас сэхээнд шил­жүүлсэн эсэхэд нь анхаарал тавиагүй эмч нарт хариуцлага тооцоогүй байгаа юм. Мэдээж, энэ нь сайдын мэдэлд үлд­сэн байх л даа. Эрүүл мэн­дийн нэгдлийн Ёс зүйн хо­роо хуралдаж, хуралдаж чад­дагаараа хоёр сувилагчдаа л хариуцлага тооцож. Ха­рин эмч нарын асуудлыг Нийс­лэлийн эрүүл мэндийн газар Эрүүүл мэндийн яаманд үлдээ­сэн бололтой.
Тэртэй тэргүй эмч сувилагч гэдэг эрэлт ихтэй мэргэжил учраас Сүхбаатар дүүргийн эрүүл мэндийн нэгдлээс халагдсан хоёр сувилагч маргааш гэхэд аль нэг хувийн эмнэлэгт амьтан хүн аашлаад сууж байх биз. Хатуухан хэлэхэд, хүүхдийн аминд шууд нөлөөлсөн эдгээр хүнд эрүүгийн хариуцлага хүлээлгэдэггүй юмаа гэхэд сувилагч гэх хүний амь насыг хариуцдаг өндөр хариуцлага шаардсан ажлыг хийх эрх ахиад олгомооргүй.
Сүхбаатар дүүргийн эрүүл мэндийн дарга бас л ха­риуцлагад татагдах нэг эт­гээд. Гэсэн хэдий ч ажилтны алдааг хүлээх даргын суудалд сууж байгаагийн хувьд  М.Чимгээ “Ар гэрийнхэнд нь болон иргэдэд хандан чин сэтгэлээсээ уучлал гуйж бай­на. Үнэхээр харамсалтай юм бол­лоо. Тэр шөнө хоносон эм­чийг үнэхээрийн гарынхаа салаа­гаар юм гаргачихлаа даа, хянасангүй дээ гэж бодож бай­гаа нь үнэн. Манай эмч сувилагчийн хариуцлагагүй, өвчтө­ний биеийн байдлыг төгс үнэлж чадаагүйгээс ийм юм болсон. Өчигдөр бид 12 цаг хүртэл энэ талаар тун­гаан ярилцсан. Өнөөдөр ч ма­най ёс зүйн хороо бүрэн бүрэл­дэхүүнээрээ хуралдаж байна.
Сувилагч нарт хариуцлага тооцож байна. Яг ийм алдаа гаргавал бид хариуцлага тооцож болдог юм гэдгийг харуулъя гэж бодож байна. Би өнөөдөр хоёр сувилагчаа халлаа. Тасагт сувилагчгүй одоо яах билээ гэсэн бодол толгойд байна. Буруу юм хийсэн нь үнэн. Алдаа гаргасан нь үнэн. Гэхдээ бусад эмч эмнэлгийн байгууллагад хандан хэлэхэд  жижиг ч гэсэн хариуцлага үүрнэ гэдэг хамгийн чухал юм шүү гэдгийг хүн бүртээ мэдрүүлж, ойлгуулж л байх хэрэгтэй” хэмээн албан ёсоор уучлал эрсэн.
Ингэлээ гээд эмч таниас, эмнэлгээс аврал эрсэн бяцхан охин бурхны орондоо амгалан байж чадна гэж үү.